بریگیڈئیر اسد منیر گھر وچ مردہ پائے گئے

اسلام آباد(سجن رپورٹ) مشہور سوجھ وان بریگیڈئیر اسد منیر اج سویرے اپنے گھر اسلام آباد دے ڈپلومیٹک انکلیو وچ مرے ہوئے پائے گئے نیں۔ پولیس دا کہنا اے بئی اوہناں دی لاش گھر وچ چھت والے پکھے نال لمکی ہوئی سی۔ اوہناں دی لاش نوں اسلام آباد دے پمز ہسپتال لیا کے پوسٹ مارٹم کیتا گیا۔ پولیس نوں شک اے بئی اوہناں خود کُشی کیتی اے۔ اسد منیر فوج وچوں ریٹائر ہوون مگروں سی ڈی اے دے ممبر اسٹیٹ رہئے نیں تے اوہناں اُتے نیشنل اکاؤنٹیبلٹی بیورو( نیب )نے ریفرینس بنایا ہوئیا سی۔
کجھ ذریعے آکھ رہئے نیں بئی اسد منیر نے مرن توں پہلوں اک چٹھی لکھی اے جس وچ چیف جسٹس نوں آکھیا گیا اے بئی جے اوہ مویاں پچھوں بے گناہ ثابت ہو جائے تے پھیر اوس دے نال انصاف کیتا جاوے۔
اسد منیر ٹی وی چینلاں اُتے ملک دے دفاع سیاست دی تاریخ اُتے بحثاں وچ حصہ لیندے سن۔