لکھاری: طارق بٹ
وزیرِاعظم عمران خان دا آکھنا اے کہ وفاق دی کُل آمدنی 5500 ارب روپے ہے جیہدے وچوں 2500 ارب روپے صوبیاں لئی، 2000 ارب روپے قرضے موڑن لئی ہین جد کہ 1700 ارب روپے ملکی دفاع اُتے خرچ ہو جاندے نیں، ایس طراں وفاقی حکومت نوں 700 ارب روپے دا پہلے توں گھاٹا ہو جاندئے، جیہدے سِٹے چ وفاق کنگال ہو گیائے۔ وزیرِاعظم ہوراں دا ایہہ وی آکھنا سی کہ ایہدا کارن پیپلز پارٹی دے پچھلے دَور دوران آئین چ ہوون والی 18ویں ترمیم اے، وفاقی حکومت کولوں صوبیاں نوں جیہڑا پیسہ لبھدائے اوہدے چ چوکھی کرپشن ہو جاندی اے تے اوہ ترقیاتی منصوبیاں اُتے گھٹ لگدائے۔
میرے خیال مطابق 1973ء دے آئین توں بعد پارلیمنٹ تے سیاسی جماعتاں دا سبھ توں وڈا کارنامہ 18ویں آئینی ترمیم دی منظوری اے، ایہ پاکستان دا بَھلکھ اے جس پاروں صوبیاں نوں مالی خود مختاری لبھی، ایہہ نِکے صوبیاں ولوں کیتی جاون والی بہوں پرانی منگ سی جیہدا وعدہ 73ء دے آئین چ وی کیتا گیا سی۔ 18ویں آئینی ترمیم دی منظوری بعدوں اگلے کجھ ورھیاں دوران وفاقی حکومت دی ٹیکس آمدنی 2000 توں وَدھ کے 4000 ارب روپے ہو گئی، مطلب ایہدے چ دُگنا وادھا ہویا اَتے پورے ملک اُچیچا صوبہ پنجاب تے سندھ چ تریخی ترقیاتی منصوبے توڑ چڑھے۔
کوئی شک نئیں کہ صوبیاں نوں وَدھ مالی اختیار لبھن نال کئی اوکڑاں وی پیدا ہوئیاں۔ پر خالی کرپشن نوں ہی ایہدا کارن نئیں آکھیا جا سکدا، ایہدے کُجھ تکنیکی پَکھ وی ہین۔ جے صوبے ٹیکس اکٹھا کرن تے ملکی آمدنی ودھاون چ وفاقی سرکار دا ہتھ ونڈاؤندے ہین تے فیر اوس آمدن تے صوبیاں دا حق وی اے۔ صوبے وفاقی سرکار توں کوئی بھیک نئیں لیندے، اپنا حق لیندے نیں۔ وفاق کولوں اَکلے سندھ نوں ہی نئیں دوجے سارے صوبیاں نوں وی پیسہ لبھدائے، مسئلہ ایہ ہے کہ صوبہ سندھ کماؤ پوت اے تے ایہدے وسائل اُتے سبھ دی آکھ اے جس کارن کئی ورھیاں توں ایس صوبے دے لوکاں نال دھراؤ ہو رہیائے۔ صوبہ پختونخوا چ تحریکِ انصاف دی دوجی وار حکومت بنی اے، ہُن صوبہ پنجاب تے صوبہ بلوچستان چ وی ایہناں دی سرکار اے، قوم نوں پہلاں ایہناں صوبیاں نوں لبھن آلے پیسے دا حساب دِتا جائے۔ سندھ اَکلا صوبہ اے جیہڑا اَج وی دوجے سارے صوبیاں دے حق دی لڑائی لَڑ رہیائے تے جے 18ویں ترمیم مُک جاندی اے تے فیر پاکستان مُڑ 50 ورھے پچھے ٹُر جاسی۔
وزیرِاعظم بنن توں پہلاں عمران خان کہندے سن کہ اوہ حکومت چ آ کے 4000 دی تھاں 8000 ارب روپے تائیں ٹیکس اکٹھا کرن گے اَتے ملک وچوں کرپشن مکاون گے جد کہ اوہ ایہناں وچوں اِک وی کم نئیں کر سکے، ایہدے اُلٹ پچھلی مسلم لیگی سرکار دے منظور کیتے 1100 ارب روپے دے دفاعی بجٹ دی تھاں ہُن تائیں 1700 ارب روپے خرچ کر دِتے گئے نیں، کوئی نئیں دَس سکدا کہ ایہ وادھو 600 ارب روپے کِدی منظوری نال خرچ ہوئے تے اَگوں ہور کِنے خرچ ہوسن؟
وزیرِاعظم صاب جے کر تُسی اصلوں لوکاں لئی کُجھ کرنا چاہوندے او تے ایدھر اُدھر نسن بھجن دی تھاں سبھ توں پہلاں:
1. وفاق دی آمدنی ودھاؤ
2. وفاقی اداریاں وچوں کرپشن مکاؤ
3. وفاقی حکومت دے اخراجات گھٹاؤ۔
تے جے تُسی ایہ نئیں کر سکدے تے فیر بھاویں جِنا مرضی کھپ رَولا پاؤندے رہوو کُجھ وی چنگا نئیں ہونا۔
وزیرِاعظم صاب وفاق 18 ویں آئینی ترمیم پاروں نئیں 70 ورھیاں دیاں آپنیاں غلط پالیسیاں پاروں کنگال ہویائے تے جے کسے نوں ہُن وی سُرت نا آوے تے فیر اساڈے سبھ دا رب ای راکھا۔
زبردست طارق جی—–چھا گئے اوھ———–