لکھاری، امجد سلیم منہاس
گاہل کوئی وی کڈھے گاہل اے۔سٹیج توں یا اسمبلی وچ، گھر یا گلی اچ، پارٹی میٹنگ یا کارنر میٹنگ اچ، موچی دروازے یا کنٹینر تے کھلو کے۔۔۔گاہل گاہل ہی اکھوائے گی۔
گاہل اوس ویلے جمی جدوں جائیداد آئی تے نال ای انسانی نسل زنانی دی تھاں پیو توں پہچھانی جاون لگی۔
ساڈے خطے وچ ایہدا مڈھ تریخ پاکستان وچ بھجا جدوں اسیں مذہب دے ناں تے قوم ہون دا اعلان کیتا تے اوس ویلے دارالعلوم دیوبند دے عالماں تے ابوالکلام آزاد نے مخالفت کیتی کہ قوم مذہب توں نہیں وطن توں بن دی اے۔بس فیر اللہ دوے تے بندا لوے۔۔۔مسلم لیگیاں نے ایس ایس ذات دی گاہل ایناں عالماں تے سیاستدانوں نوں کڈھی کہ بندہ اج وی سنے تے شرما جاوے۔
پر نہیں اسیں شرمانا نہیں بھڑکانا رکھیا ہویا اے۔ 2008 وچ جدوں ن لیگ پیپلز پارٹی دے نالوں اتحاد توڑ کے اپوزیشن وچ رلی تے ایناں اپنی پہلی ریلی کڈھی۔ایہہ خاکسار کسے اقلیتاں نال ہوون والی بدسلوکی دی نندیا کرن لئی پریس کلب اگے اک وکھالے چ کھڑا سی تے لیگیاں دیاں ریلیاں اوتھوں لنگدیاں ہویاں اسمبلی ہال ول جا رہیاں سن۔ایس موقع تے ایناں گناہ گار کناں نے ایسی ایسی گندی گاہل صدر زرداری تے اوہدے بچیاں بارے سنی کہ اج تک شرمندہ ہاں کہ اسیں کس سماج دا حصہ ہاں۔
مڑ تبدیلی لیان والیاں کول لائسنس آگیا تے اودھر سوشل میڈیا دا ہتھیار پوری چمک دمک نال ایناں ہتھے چڑھ کے کشتوں کے پشتے لگانے لگا۔شیخ رشید جیہدی مسلم لیگی تربیت انت دی سی، ایناں نوں گاہلاں کڈھن دے نت نویں ڈھنگ دسیندا۔ایہدا مقابلہ اگر کوئی کر سکدا سی تے اوہ رانا ثناء اللہ سی لہذا اوہنوں میدان وچ لیاندا گیا۔
اج بلاول بھٹو زرداری جیس زور دار طریقے نال مریم نواز نوں ریسکیو کرن آیا تے ایہدے وچ غیر پارلیمانی لفظ اگر نہ ورتیا جاندا تے اک خوبصورت گل ہونی سی۔
اک گل چیتے وچ رکھو کہ اسیں پوری قوم دے طور تے ذلت دا شکار ہو چکے ہاں جیہدی وڈی مثال تحریک لبیک وچ گندیاں اور غلیظ گاہلاں دا انھے واہ ورتارا سی جیہدا شکار پترکار، سیاستدان، مخالف مذہبی رہنما تے سارے ملک دی خلقت نوں ہونا پیا۔
صرف اک محکمہ بچیا جنہے پیسیاں والے لفافے دے کے ایہناں نوں گھریں ٹوریا تے کہیا ہن جاو اسیں وی تہاڈے ہاں۔
