لکھاری : زاھد اقبال بٹ
ساڈے جگت وچ کُڑیاں مُنڈیاں دا انقلابی بنن دا تَاپ کالج یُونیورسٹیاں وچ تعلیم مکمل کرن تُوں بعد ٹھنڈا پَے جاندا اے ، اس َدور وچ کوئی کامریڈ ، تھیٹر ایکٹویسٹ ، شعلہ بیاں مقرّر ،کوئی لمّے لمّے والاں مست ملنگ ، کوئی ارسطو ، میکاولی ، کارل ماکس دے فلسفیاں دا آزاد ریڈیو دا رُوپ دھارے بہروپئے بنے رھندے نیں ، ایہ انقلابی فروٹ چارٹ دو تن سال ایہ پروگریسو پڑھیار یونیورسٹی تے کالجاں وچ خُوب ویچدے نیں ، کدِی ایہ شَیو ودھا کے ریسپوٹین ، میکاوولی تے کارل ماکس دا سانگ رچاندے نیں تے کَدی کلاس وچ دھوتی کُرتہ زیب تَن کردے نظری آوندے نیں تے کدی چی گویرا دیاں مورتاں اپنیاں فائیلاں اُتّے چسپا کر کے ایہ تائیثَرچَھڈَن دی کوشش کریندے نیں کہ اسیں ھی ایس دھرتی دے ؛ لال پُتر آں تے ایہ کویتا دن رات آلاپ دے رھندے نیں کہ سب جگ بگّا تھی جاوے اساں رھناں لاکھے ، دَھن ، جوبن ٹھگ ھے ورگِیاں گرداناں دا مُونہ زبانی زکرخیر اوس وقت تک کردے رھندے نیں جد تک امریکہ یاں یورپ دا ٹھپّہ اپنی کَنڈہ اُتّے چَسپا نھیں کروا لیندے ۔ ایہناں ترقّی پسند اں دا فلسفہ بڑا نرالا تے خُفیہ ھوندا اے کہ خوشحال زندگی لئی پردیس جا وَسنا اے بس ، حقیقت وچ اوہ صرف اپنی ھِی ترقّی چاہ رھے ھوندے نیں ، سماج دی نھیں اسیں نمانے ایہ سمجھ بیٹھنے آں کہ اوہ پورے سماج لئی لَڑ رھے نیں پر ٹھپّہ لگّن تُوں بعد ایہ جعلی کامریڈ ماں دھرتی نوں چکمہ دے کے ، چھڈدیاں منٹ نھیں لاوندے تے مُڑ کے پِچھے ول ویکھنا وی گوارہ نھیں کردے کہ اوھدی ماں دھرتی دے وسنیکاں نال کیہ واپری اے ،،،،،، ایہ ترقّی پسند ۲۰ ، ۲۵ سال یورپ تے امریکہ دی زند گی نُوں خوب جیندے نیں، فیر ۵۵ ،٦۰ سال دی عُمر دا بارڈر ٹُّپّن تُوں بعد کالج یونیورسٹیاں وچ دو، تن سال دے کِیتے کاریاں ، سرگرمیاں دا زکر ۲۵ سال بعد شدّت نال اُگلنا شُروع کر کے اپنے گواچے انقلابی ڈَبّے نوں اجوکے سمے دی گڈّی نال ٹَوچین کرن دی ناکام کوشش کر کے زندگی دا سبب لَبھن دی کوشش کریندے نیں۔۔۔۔۔۔۔۔ پر۔۔۔۔۔۔۔۔ مترو ۔۔۔۔۔۔ اِنج مارے کَھپیاں نُوں پُورناں آسان نھیں ھوندا جد ھر ویلے دھرتی وَل دَھیان ھی نہ ھووے ۔
554
