وڈے نقصان توں کیویں بچئے

لیکھ، امجد سلیم منہاس

ہر آون والا دن ایس گل دی یاد دہانی کراندا اے کہ ہر ادارہ تے محکمہ اپنی آئین وچ متھی حد نہ ٹپے۔
سیاسی قوتاں عوامی مینڈیٹ دے احترام نوں ملکی سالمیت نال جوڑدیاں نیں تے 70 دے وچ ملک دے ٹٹن نوں اپنی دلیل دے طور تے بیاندیاں نیں جیہڑی اپنی تھانویں اک حقیقت اے۔
اج دا سیاسی بحران حاکم ٹولے دے اک محکمہ دی ضد پاروں سنگین ہو چکیا اے کہ اوہ ملک وچ اپنی مرضی دی حکومت چاہندا اے تے لوکاں تے اوہناں دی وڈی نمائیندگی کرن والے رہنما ایہنوں چیلنج کردے نظری پیندے نیں۔
ہر دس سال مگروں ایس محکمے دا محلے دے کن ٹٹے وانگوں رُسنا ملک وچ وڈے بحران دا کارن بن جاندا اے۔ وچکارلے دس ورھیاں وچ کار سرکار وچ ایہناں دا مداخلت نال ہمسایہ ملکاں نال تعلقات ٹھیک کرن ہر کوشش نوں ناکام بناون دے بے انت جتن ہوندے نیں۔ بے گانی جنگاں دا حصہ بنیا جاندا اے۔ ملک اندر مذہبی انتہا پسنداں نوں کھلی چھٹ دتی جاندی اے جیہڑے سیاسی حکومتاں نوں بلیک میل تے کم کرن توں روکدے نیں۔ پچھلے دس سالاں وچ عدلیہ نوں ایہو جیہے مقصداں وچ ورتن دا بے رحمانہ استعمال ودھ گیا اے۔ ایس نوں سوشل سائنسٹسٹ “جوڈیشل کو” وی آکھدے نیں۔ ریکو ڈک تے کارکے ایہدیاں معاشی مثالاں نیں۔
ہن انج جاپدا اے کہ ایس لڑائی دا گھیرا تنگ ہوندا جارہیا تے محکمے دے اندر وی جا وڑیا اے جیہدا باہروں وی سیاسی اظہار شروع ہوگیا ہے۔ ایہہ گل خطرناک اے۔ ایہنوں ٹالن لئی ملک دی ہر قوت نوں سنجیدگی تے تیزی نال سوچنا ہووے گا کہ ایہدا براہ راست تعلق ملک دی سلامتی نال اے۔
احتساب دے ناں اتے سیاسی تنگ نظری نے ملک نوں ہمیشہ سخت نقصان پہنچایا اے۔ کنی کو دیر تک کرپشن کرپشن دا ناں لے کے معاشی اشاریاں دی حقیقت توں اکھاں چراو گے۔ اپوزیشن نوں ختم کرن دا خواب ہر حاکم نے ویکھیا اے۔ اے خواب ملک نوں تباہ تے کر سکدا اے خوشحال نہیں۔ ایس لئی بچگانہ ضد چھڈ کے اپوزیشن نال گل کرو۔ چور چور دی گردان چھڈو تاکہ مذاکرات دی فضا بنن دا آغاز ہووے تے اپوزیشن دا اعتماد بحال ہووے۔
یاد رکھو اخیر مذاکرات ول ای آنا جے بہتراے کہ وڈے نقصان توں پہلے ایہ ہو جاون۔