لکھاری، محمد حنیف
نکے ہوندے سانوں علامہ اقبال دے ایس شعر نوں رٹا لوایا گیا جیہدے وچ اوہناں اپنا دوجا خواب بیان کیتا سی۔
ایک ہوں مسلم حرم کی پاسبانی کے لیے
نیل کے ساحل سے لے کر تابخاکِ کاشغر
قائدِ اعظم نوں اللہ تعالیٰ مہلت نہ دتی تے اوہ خواب نمبر 1 یعنی پاکستان دی تعبیر ویکھ نہ پائے۔ باقی ساڈے کسی رہنما نوں علامہ اقبال دا دوجا سفنا سمجھ ای نئیں آیا۔ ایوب، ضیا، مشرف امریکا دی چاکری کردے رہے۔ بھٹو نے اک دفعہ سارے مسلمان بادشاہواں نوں لاہور دی بادشاہی مسجد وچ کٹھا کیتا لیکن آپ بھٹو دا تے بادشاہی مسیت وچ اکو صف وچ کھلوکے نماز پڑھن والے بوہتے لیڈراں دی اخیر چنگی نئیں ہوئی۔ ایس مگروں امت وی تتر بتر ہوگئی۔
جس حرم دی پاسبانی اساں کرنی سی، اوس دے پاسباناں نے امریکا تے یورپ توں ہر ورھے کھرباں دا اسلحہ خریدنا شروع کر دتا ایس دے نال ای گوانڈھ وچ بیٹھے غریب یمنی امتیوں اتے آزمانا شروع کر دتا۔
اس سارے قصے وچ امت امُہ کدوں بنی سانوں پتہ ای نئیں چلیا۔ لیکن امُہ دے تن وڈے یعنی مہاتر محمد، اردگان تے عمران خان سر جوڑ کے بیٹھے ایہہ سوچن لئی کہ امُہ دا مسئلہ کیہ اے۔ امُہ چاہندی کیہ اے؟ جواب آیا کہ اک ٹی وی چینل۔ چونکہ دنیا امُہ نوں سمجھن وچ ناکام رہی اے، مسلماناں بارے بوہت ساریے بھلیکھے نیں۔ کیوں جے اسلام توں نفرت اک وبا بندی جا رہی اے، ایس نوں ڈکن لئی کیہ کیتا جاوے۔ اک ٹی وی چینل کھولیا جائے تاں جے دنیا نوں اسلام دا اصلی چہرہ وکھایا جائے۔ سوچیا تے ایہہ وی جاسکدا اے کہ اپنے کرتوت وغیرہ ٹھیک کرن دی کوشش کیتی جائے۔ جے اوہ کجھ مشکل لگدا اے تاں کم سے کم اک سانجھا بیان ای دے دتا جاوے کہ حرم شریف اتے ساڈی جان وی قربان اے لیکن جے ایس حرم دا پاسبان شہزادہ اک صحافی نوں استنبول دے سفارتخانے وچ بلوا کے اوہدے ٹوٹے ٹوٹے کراکے لاش غیب کردے تاں ایس نال اسلام دی کوئی نیک نامی ہوئی۔
جے امُہ دے تن وڈیاں نے فیصلہ کیتا اے تاں چینل تے بن کے رہے گا۔ ایس اتے ساڈا مثبت امیج بناون لئی خبراں پتہ نئیں کتھوں چلن گئیاں۔ کیہ یمن دے بے وس امتی ’اسلام امن دا دین اے‘ ورگے پیغام دیون گے۔ ترکی دی جیلاں وچ قید سینکڑاں صحافیاں تے ہزاراں سیاسی کامیاں توں پچھیا جاوے گا کہ نیل دے ساحل چلو گے یاں تہانوں کاشغر وچ سیاسی پناہ دوائی جائے۔ کیہ پاکستان توں جان بچا کے نسن والے ہزارے جیہڑے ہن ملائشیا وچ پناہ لبھ رہے نیں۔ پچھیاجاوے گا کہ ملائیشیا دے امتیاں دی میزبانی دا مزہ آ رہیا اے؟ کم سے کم ایہہ تاں وکھایا ای جاسکے گا کہ ڈی ایچ اے کوئٹہ امت دی تریخ وچ اک وڈا واقعہ اے تے ایہدے اشتہار تے نقشے ویکھ کے کسے نوں شک ہوسکدا اے کہ امت دا مستقبل چانن والا نئیں اے۔
ملائشیا دا بوہتا پتہ نہیں لیکن پاکستان تے ترکی وچ بوہت سارے صحافی بے روز گار نیں سگوں ترکی وچ تاں بے روزگار صحافیاں دے کھان تے رہن دا بندوبست جیلاں وچ ہی کردتا گیا اے۔ (جیہڑے پاکستانی صحافیاں دا ہیرو اردگان اے اوہناں نوں یاد کرانا پیندا اے کہ تہاڈے ورگے ہزاراں ہیرو صحافی ترکی دی جیلاں وچ نیں تے جیہڑے اوتھوں دے جنگ، جیو، ڈان، نوائے وقت سن، ہن مر چکے نیں)۔
تاں امُہ دے نویں چینل لئی صحافی تے ٹکے ٹوکری مل جاون گے لیکن چینل نوں کامیاب بناون لئی جیہڑا وژن چاہیدا اے اوہ صرف تے صرف سر غفور دے کول اے۔ میں اوہناں دا نام صرف ایس لئی تجویز نئیں کر رہیا کہ اوہ پاکستانی نیں سگوں ایس کارن کہ اپنے کم نال لگن ،جڑت تے مہارت بے مثال اے۔ ویسے وی امُہ دا سافٹ امیج بناون لئی سر غفور دے سوفٹ ٹچ دی ضرورت اے۔ ترکی وچ جیہڑا صحافی حکومت نوں پسند نہیں آندا اوس نوں جیل گھل دتا جاوندا اے۔ سر غفور کسے صحافی توں نظراں پھیر لین تاں اوہ آپے ای گھر جا کے بیٹھ جاندا اے تے یو ٹیوب چینل کھولن دے منصوبے بناون لگدا اے۔
ویسے جتنے چینل سر اک ویلے وچ بند کر دیندے نیں، مہاتر تے اردگان نوں ایس لئی نکی فوج دی لوڑ پیندی اے۔
پاک فوج پاکستان دا فخر اے تے پاک فوج دا مان کون اے۔ میں بار بار اوہناں دا نام لے شرمندہ نئیں کرنا چاہندا لیکن یقین کرو کہ ویلا آگیا کہ اوہناں دی خدمت امُہ دے حوالے کیتی جاون۔ اوہناں نوں 24 گھنٹے والا نیوز سائیکل سنبھالن دے نال شو بزنس، میوزک، فلم تے ڈرامہ پروڈکشن دا وی وڈا تجربہ اے۔
