کج کم آپ وی کرلیا کرو

عاصمہ جہانگیر نوں ساڈے نال وچھڑے اک ورھا لنگھ گیا،ایس دوران ہر ہفتے کم از کم ایک دیہاڑ اجیہا آیا جد ساڈے دلاں وچوں واج آئی ،اج عاصمہ ہوندی تاں ساڈی جان تے آن والے ایس نویں عذاب دا کج کردی۔ چیف جسٹس ثاقب نثار ہوری ہسپتالاں دے دورے کردے،اوہ ڈیم دی چوکیداری دے دعوے کردے۔ ایس تے عاصمہ کیہ کہندی۔
جیہڑی انتخابی مہم عمران خان نوں سرکار وچ لیائی، اوس اتے عاصمہ کیہ آکھدی۔جیہڑی ہردوجے دیہاڑے پی ٹی ایم دے کارکناں، حامیاں نوں دی ضمانتاں کران پہنچ جاندی ، نوکریاں توں کڈے جاون والے صحافیاں نال موڈھا لاکے کھلوندی ۔
سانوں سبھاں نوں معلوم اے اوہ کیہ کردی، کیہ کہندی، کیوں جے اوہ ایس قوم دے ضمیر دا کردار چالیہ ورھیاں توں نبھارہی سن۔ ساڈیاں زباناں تے لگن والے تالیاں دی چابی عاصمہ جہانگیر اپنے نال نئیں لے گئی، بلکہ ساڈے کول چھڈ گئی اے۔
عاصمہ نوں معلوم سی اوہ کلی کج نئیں کرسکدی ایس کم لئی لوکاں نال جڑنا ضروری اے۔ بلوچستان، خیبرپختونخوا، اندرون سندھ جتھے سیاستدان صرف الیکشن ویلے جاندے سن تے صحافی کسے آفت آن تے،عاصمہ پشین توں پشاور تیکر گھومدی رہندی سن۔
اوہ جناں بولدی اوس توں ودھ سندی وی سن۔ مخالف اوس نوں غصے والے زنانی جاندے سن۔اوس نوں ہسنا وی آوندا تے ہسانا وی، اوہ کدے کدے اپنا غصہ پنجابی دی جگتاں نال کڈدی سن۔
اوہ پاکستان دی صحافت تے آن والے عذاب بارے وی جانکاری رکھدی سن، اک واری کج پتر کار اپنے مالکان بارے دکھڑا سنارہے سن۔ اوہناں توجہ نال گل سنی تے پچھیا صحافیاں دی یونین وچ تسیں ہو۔اوس جواب دتاجی ممبر آں۔ پر زیادہ ایکٹو نئیں۔
عاصمہ نے آکھیا تے ایکٹو ہوجا،کج کم آپ وی کرلیاکرو،
اوہنا دی روح سانوں آکھ رہی اے پئی تسیں وی کج کم آپ کرلیا کرو۔
(شکریہ بی بی سی)