لکھت، امجد سلیم منہاس
کشمیر رپھڑ اتے پاکستان ولوں بنائی جاون والی کمیٹی ریاست نوں ڈیموکریٹک سٹیٹ توں ودھ سیکیورٹی سٹیٹ دا رد عمل بناوندی جاپدی اے۔ پارلیمنٹ وچ موجود جماعتاں تاں دور دی گل اے وڈی سیاسی جماعتاں دی وی ایس کمیٹی وچ کوئی نمائیندگی نئیں۔ ایہدا سدھا سدھا مطلب اے کہ اپوزیشن تے کسے وی پدھر اتے وساہ نئیں کیتا گیا۔ ایس حقیقت دا وکھالا اوس ویلے ہوگیا سی جس ویلے پارلیمنٹ وچ پیش کیتی گئی قرارداد وچ انڈین آئین وچوں کشمیر بارے خاص حیثیت ختم کرن والی شقاں دا ذکر تیک نہیں سی۔ اپوزیشن دے رولا پاون تے قرارداد وچ ایہناں دا ذکر کردتا گیا۔ ایہہ نرا اتفاق سی؟ میرا خیال اے نئیں۔ کیوں جے حکومت محض تاثر ہی نئیں صاف آکھدی اے کہ فوج تے سیاسی حکومت اک صفحے اتے نیں۔ امریکہ دا دورہ وی دوناں دا سانجھا سی۔ ٹرمپ نے مودی دا ناں لے کے آکھیا سی کہ اوہنے وی مسئلہ حل کروان لئی وچولا بنن لئ اوس توں بینتی کیتی اے۔ ایس گل نوں وی نظر وچ رکھن دی لوڑ اے کہ وزیراعظم نے اپنی تقریر وچ دسیا کہ بی جے پی نے الکشن منشور وچ کشمیر بارے اپنے ایس پروگرام دا اعلان کیتا سی۔ شیریں مزاری نے کل راتیں اک ٹاک شو وچ دسیا کہ پاکستان نے بروقت مناسب ردعمل نہیں دتا تے سست روی شکار ہویا۔ رکن قومی اسمبلی قیصر شیخ آکھدے نیں کہ دال وچ کالا لگ رہیا اے۔ بلاول بھٹو، احسن اقبال نے وی اپنے تحفظات دا اظہار کیتا اے۔
ایس سبھ کجھ دی روشنی وچ اسیں ایہہ نتیجہ کڈھ سکدے ہاں کہ سیاسی حکومت تے اوہدی فوجی طاقت ایس مسئلے تے اک نتیجے تے پہنچ چکے نیں کہ کشمیر مسئلہ دا حل موجودہ اسٹیٹس کو اے؟ اگر ایس طرحاں نہیں تے مڑ اینی پردہ داری کاہدی؟ کیوں نئیں وسیع البنیاد ڈائیلاگ مطلب سبھ نوں گل بات وچ شریک کرنے دے عمل دا آغاز کیتا جا رہیا؟
یاد رکھو ملک وچ غیر جمھوری گرفت رکھن لئی سازشی طریقیاں نوں کوئی وی نہیں منے گا۔
756
