دوجا ورقہ کھل گیا۔۔۔۔

شاہد شاہ

کپتان دی سرکار نے جیویں کیویں اک ورہ کڈھیا۔ پورا سال اکو ای واج کن وچ پیندی رہی بئی حکومت تے فوجی اسٹیبلشمنٹ اک پیج اتے نیں۔ ایہہ اک پیج عوام دے گل ایسا پیا کہ کسے پاسیوں چنگی خبر نہ آئی۔
دوجی گل ایہہ کہ ماڑے نوں تے چھڈو اوہدے نال تے ہر دور وچ دھرو ہویا، چنگے بھلے کھاندے پیندے لوکاں دیاں لکیراں کڈھا دتیاں، کاروبار فنا ہوگئے، دکاناں والے ویہلے بیٹھے دسدے نیں۔ ہر بندہ نکو نک تنگ، سرکار مست پیالہ پی کہ ستی اے۔
اجیہے حالات بوہتی کاڈھ نہیں کڈھدے، پچھلے چار دیہاڑ کجھ انج دے لنگھے نیں، جنہاں وچ چپ کر کے دوجا ورقہ تھلیا گیا۔ دوجے ورقے دامڈھلا کم خان صاحب دے فرمان دی فوجی ترجمان ولوں تردید ہوئی، اوہناں چیف صاحب دی نوکری وچ ودھاوے بارے بیان نوں خوب لتاڑیا، تے آکھیا بئی چیف صاحب ہور نوکری نئی سی چاہندے، اوہناں سرکار دی مرضی پوری کیتی۔ دوجا وزیراعظم دے بیان دے الٹ فوجی ترجمان نے پورے زور نال دسیا بئی ضروری نہیں کہ پاکستان حملے وچ پہل نہ کرے۔
مطلب پاکستان بھارت اتے حملہ کر سکدآ اے، اوہناں پاک فوج دی ایٹمی پالیسی وی نتار کے دسی تے ایٹمی اسلحے نوں پاکستان دا ڈیٹرنس قرار دتا۔ فوجی ترجمان دی دھواں دھار گل بات مگروں حکومتی پکھاں وچ موت ورگا سناٹا اے۔
اک ہور وڈا معاملہ ہن افواہواں توں اڈ حقیقت دا بوہا کھڑکا رہیا اے۔ ایہہ معاملہ شریف خاندان دی جان خلاصی دا اے۔ ایس ویلے جنے منہ اونیاں گلاں والی صورتحال اے۔ عرب ملکآں سعودیہ تےامارات دے وزیراں دے دورے نے افواہواں دی اگ ہور بھڑکا دتی۔ پردے وچ ہون والی پیشرفت نوں ڈیل دا ناں دتا جارہیا اے۔ آخری پیشی اتے مریم نواز نے جیہڑی چپ وٹی اوہ وی اک اشارہ سمجھیا جا رہیا اے۔ کہن والے تے ایہہ وی کہندے نیں کہ کپتان ہن کھل کے کھیڈنا چاہندا اے۔ جیہدے لئی اوہنوں سیاسی طاقتاں دی حمایت چاہیدی اے۔ کپتان عوام وچ زیرو ہویا پھردا اے ہن اوہنوں پارٹی بچان دا خیال آرہیا اے۔ سوہ کٹھ پتلی دے الزام تھلوں وی نکلن دی وی آہر کر رہیا اے۔ دسیا جارہیا اے کہ چھیتی ای علاج دے بہانے نوازشریف نوں ملکوں کڈھ دتا جاوے گا مریم نواز وی ضمانت لے کے پیو کول جا پہنچے گی۔ گل ایتھے ای نہیں پئی مکدی دوجے صفحے وچ جوابی وار دے آثار وی دسدے نیں۔ جیہدے تحت شریفاں دی اقتدار وچ واپسی لئی دوجے پاسے وی ڈیل ہوسکدی اے۔ ملک دا جام ہویا معاشی پہیہ چلاون لئی نویں سیاسی کہانی ٹوری جا سکدی اے، جہیدے تحت ماڑی اکثریت دی حکومت دے مونڈھیاں توں اقتدار دا بھار لاہ کے 2020 دے شروع وچ نویں الیکشن کراکے طے شدہ شرطاں نال شریفاں نوں اقتدار دا راہ دے دتا جاوے۔ ایس ویلے میچ اپنی اخیر ول ٹر پیا اے، ویکھنا اے وے کہ کون کیہدے نال ٹردا اے۔