لکھاری، نعمان یاور
جمہوریت سبھ توں وڈا انتقام
معلوم نئیں ایہیہ گل بے نظیر آکھی وی سی یاں ایس نوں اک بیانیہ دے طور اتے پیپلزپارٹی دے سوجھواناں اگے ٹوریا، مقصد تاں چنگا ای لگیا سی۔ شاید اوہناں ایس اتے عمل دی کوشش وی کیتی۔ کیوں جے پیپلزپارٹی دوجی جماعتاں دے مقابلے بوہتا بدلا لین دا وہیار نئیں اپناون دی۔ ہن وی بلاول بڑی سادگی نال آکھ دیندا اے پئی عمران خان دعا کرے ساڈی اگلی سرکار آوے کیوں جے اسیں بدلا نئیں لیندے، نون لیگ تے ہن مولانا فضل الرحمان دا نام لیندے اوہناں آکھیا اوہ بدلا ضرور لین گے۔
جمہوریت نرا الیکشن کرانا تے چن کے لوکاں دی نمائندگی دا نام نئیں، کیوں جے جیہڑی جماعت الیکشن کراندی اے پر اوس دا مزاج فسطائی اے، اوس نوں جمہوری کیویں آکھیا جاسکدا اے۔ اکثر بڑی سادگی نال اک پرانی گل لوکیں ہن وی کہہ دیندے نیں، جماعت اسلامی واحد جمہوری جماعت اے، کیویں جی اوہ الیکشن کراندی اے۔ اوتھے ٹبر پالن نئیں ہوندا۔ اکو خاندان دی حاکمی نئیں ہوندی۔ ۔ اوہدے مزاج نوں لوکیں بھل گئے، ہن وی اوس نوں پتہ نئیں ہوندا، اپنا دینی رنگ سامنے رکھنا اے یاں سیاسی کردار وکھانا اے۔ کدے کدے انج لگدا اے اک جماعت جیویں کوئی کمپنی ہوندی اے اوہ اپنا دفتر کھول کے کم کردی رہندی اے کدے لوڑ پین تاں مارکیٹنگ کرنا شروع کردیندی اے۔
دوجے پاسے نری سیاسی جماعتاں وچ وی جمہوریت کوئی ودھ نئیں، مسلم لیگ نون اتے ایہہ الزام کجھ غلط وی نئیں اوتھے میاں محمد نواز شریف دی مرضی چلدی اے، اوہ کجھ بندیاں جیہدے وچ اوہناں دی دھی مریم نواز وی اے، گل سن دے نیں۔ معاملات نوں اکو ہتھ ہیٹھ رکھن دے کارن ای، ریاست دی ڈوراں سانبھن دے دعویداراں اوہناں دا دھڑن تختہ کردتا۔ لوکائی دی اک وڈی گنتی دی نمائندہ جماعت دا آگو کیویں اک پاسے لادتا، جمہوری نظام نوں مضبوط کیتا ہوندا، پارلیمنٹ نوں بوہتے اختیار دتے ہوندے، دوجی جماعتاں نال وڈے ملکی معاملیاں اتے صلاح لیندے ہوندے ، تاں شاید اوہناں پاسے لانا اینہاں سوکھا نہ ہوندا۔
ہن جیہڑے حاکم بن کے آئے، کہن نوں اوہ وی جمہوری سوچ دے چاہیوان نیں،
جمہوریت تاں دوجے نوں برداشت کرن، اوس دی گل نوں سنن، لوکاں نال رل کے چلن دا نام اے، ایہہ گلاں وچ ای چنگا لگدا، کرنا کجھ اوکھا کم اے۔ جدوں برداشت دی گل آوندی اے تاں غصہ اک پاسے رکھنا پیندا اے۔ جے مخالف اتے غصہ ای نہ مکن دا ناں لوے فیر جمہوریت مشکل وچ پے جاندی اے، ماضی وچ وی انج ہوندا آیا مخالف دھر دے لوکاں نوں چپ کرایا گیا، مقدمے بنائے گئے، جیلاں وچ پایا گیا، ملک توں باہر گھلن اتے مجبور کردتا گیا۔
جتھوں تیک الزاماں دی گل اے من لیا کئی ٹھیک ہوون گے، تے فیر سچے ثابت کرکے سزاواں دوا کے جیل گھلنا چاہیدا اے۔ فیر لوکیں آپے ای اگے توں فیصلہ کرلین گے،
عمران خان تاں پہلے دیہاڑ توں پک کررکھیا سی، کرپٹ لوکاں نوں نئیں چھڈن گے، ٹھیک اے لوکائی نوں وی بڑی تپ اے پئی کرپشن پاروں ملک دے حالات وگڑ گئے نیں، جیہڑا غلط اے اوس نوں ثابت کرکے اندر کرو، ہاں غصہ نہ کرو، جیہڑا کرن والا کم اے کرو۔
تسیں ہن کسے نوں بولن نئیں دیندے ، کوئی تہاڈی مخالفت وچ گل ناں کرے، اوس نوں چپ کران لئی، میڈیا نوں چپ کرایا جارہیا اے۔ جتھے پتہ لگیا کہ فلاں بندہ فلاں لیڈر نوں ایہہ گلاں لکھ کے دیندا اے، اوس نوں راتوں رات فرضی مقدمے وچ چک لیندے او، جس جرم دی سزا چھ دیہاڑ قید ہووے اوہدے اتے چودہ دناں دا ریمانڈ دے جیل گھل دیندے او۔ رولا پیندے ای کسے دے آکھن اتے چھٹی والے دیہاڑ اوسے جج توں مڑ ضمانت دوا کے دستخط ہوون توں پہلاں ای روبکار وی جیل گھل دیندو او۔
انج لگدا ملک جمہوریت دی کسے ری مکس فلم دے منظر وکھارہیا اے، جیہدے ڈائیلاگ وی نویں نیں، اوہدا ٹائٹل وی تبدیلی اے، لوکیں ویکھ تے بڑے چا نال رہے نیں، پر اوہناں نوں ایس فلم نے ڈراونی فلماں وانگ مڑکے مڑکی کرچھڈیا، اوہناں ڈر دے مارے اکھاں میٹ لئیاں نیں، ہن ایس نویں تبدیلی والی جمہوریت نوں اکھ کھول کے ویکھن دی ہمت وی نیں۔ انج لگدا اے جیوِیں جمہوریت ای سبھ توں وڈا انتقام ایس دا ٹائٹل اے۔
