اسلم ڈوگر
وزیر اعظم عمران خان نے سندھ دے شہر گھوٹکی وچ جلسہ کردیاں اکھیا اے بئی اٹھارہویں ترمیم دے بعد مرکز کنگلا ہو گیا اے۔ عمران خان دی ایہہ گل اوہناں دی اپنی جماعت پاکستان تحریک انصاف دے منشور توں بالکل پٹھی اے۔ اوہناں دی جماعت کا منشور صوبیاں نوں خود مختیاری دینا اے۔ پچھلی واری جدوں خیبر پختونخوا وچ پی ٹی آئی دی حکومت سی تے مرکز وچ پاکستان مسلم لیگ نون دی حکومت سی اوس ویلے پاکستان تحریک انصاف دے آگو تے صوبے وزیر اعلی پرویز خٹک کئیں واری اپنے صوبے دے حقاں لئی ٹی وی اینکراں نوں انٹرویو دیندیاں سیاپے کر دے سن بئی مرکز اوہناں دے حق کھا گیا اے۔ نالے اوہ پنجاب نوں وی دوش دیندے سن۔
پاکستان پیپلز پارٹی دے آگو تے سابق صدر آصف علی زرداری نے بہت پہلوں آکھیا سی بئی اوہناں دی جماعت دی بانہہ مروڑ کے مجبور کیتا جا رہیا اے کہ اوہ آئین دی اٹھارہویں ترمیم نوں مکاون وچ مدد دیں تے اوہناں ایہہ نہیں ہون دینا۔ پہلوں تے لگدا سی بئی زرداری اپنی دھون بچاون لئی ایہو جئی گلاں کر رہئے نیں۔ اج عمران خان دیاں گلاں سن کے ایہہ گل کجھ حقیقت تے سچی لگدی اے۔
اٹھارہویں ترمیم دے خلاف سب توں پہلاں آرمی چیف جنرل قمر جاوید باجوہ نے اخباری نمائندیاں نال ہوئی اوس بیٹھک وچ گل کیتی سی جس وچ کوئی 35 دے نیڑے صحافی سدے گئے سن تے اوہ کئیں گھنٹے وکھو وکھو کھیتراں تے گل کر دے رہئے۔ ایہہ گل بات اخباراں تے ٹی وی چینلاں اتے سدھی چلانی نہیں سی سگوں اپنی اپنی سمجھ دے مطابق ایس دے وچوں مطلب کڈھ کے چلانے سن۔ اوسے ویلے کئیں سیانے اخباری نمائندیاں آکھ دتا سی بئی اٹھارہویں ترمیم نوں چھیڑن دی کوشش اک واری ہونی ضرور اے بھانویں ایس وچ کامیابی ہووے یاں ناکامی ہوئے۔
وزیر اعظم عمران خان جہیڑے ہن تائیں ووٹراں نال کیتے اپنے کاریاں تے پورے اترن وچ ناکام رہئے نیں تے اوہناں دے بے روزگاری مکاون دے منصوبے وی ہاسہ ای بن گئے ہوئے نیں۔ مہنگائی نے لوکاں دا لک تروڑ دتا اے تے اوہناں دے وزیر خرانہ اکھ رہئے نیں بئی اجے تے لوکاں دیاں چیکاں نکلن گیاں۔ ڈالر اک سو چالہی توں ودھ گیا اے۔ پٹرول دا مل ودھایا جا رہیا اے۔ چیکاں تے واقعی نکل گیاں نیں۔
اک پاسے لوکاں دیاں چیکاں نکل رہیاں نیں تے دوجے پاسے وزیر اعظم عمران خان ایہو جئیاں گلاں کر رہئے نیں جس دے نال صوبیاں دے وچکار دوریاں ودھ سکدیاں نیں۔ عمران خان دے بارے پہلوں ای اکھیا جاندا اے بئی اوہناں نوں سیاست نہیں آؤندی تے ریاست کے معاملیاں نوں اوہ سمجھدے نہیں۔ اٹھارہویں ترمیم جئے نازک معاملیاں تے بے دلیل گلاں کر کے وزیر اعظم ایس گل نوں ثابت کر رہئے نیں بئی اوہناں نوں پچھلیاں چوناں وچ جتوایا گیا اے۔ تے جتوایا وی اوہناں نے جیہڑے اٹھارہویں ترمیم دے مخالف سن۔ اٹھارہویں ترمیم ہوئیاں نو سال لنگھ گئے نیں تے ایس توں پہلاں کسے حکومت نے ایہو جئی کوئی گل نہیں کیتی سی بئی ایس ترمیم پاروں کوئی نقصان ہو رہیا اے۔ پہلی واری عمران خان دے مونہہ توں ایہو جئی گل نکلن دا مطلب اے بئی ایہہ متہ پہلوں دا پک رہیا سی تے پیپلز پارٹی والے ٹھیک آکھ رہئے سن کہ اٹھارہویں ترمیم مکاون لئی اوہناں اتے کوئی دبا اے۔
530
بہت ودیا جناب اسلم ڈوگر صاب۔
زبردست ویرے—–
بہت مہربانی جناب سلہری صاحب۔
aye putthi matt kithon aayee jae khan saheb. soobian di aapni mukhtiari na daen magron pakistan di waddi abadi wala sooba wakh hoya hun ki chhaday ho !!!!!! lokai pehlan ai mahngai toou aajiz
paei jay hoar bhaar pat pao kadi bisp da naa di tabdeeli kadi kuch hun bas karo te apnay programme wal dhyan do yaan tusi wi wapas chheti jaana chaownday ho !!!!!! innay saal pichchay te hakim banay te do teen warhay kadan di tadbeer karo !!