لکھاری
اسلم ڈوگر
پاکستان وچ اک واری فیر نویں آئینی الٹ بازی لگن دیاں تیاریاں شروع ہو گئیاں نیں۔ ایس ملک دی تواریخ ایہہ ہے بئی ہر دس ورھے پچھوں نظام بدل جاندا اے۔ سنتالی توں 58 تائیں پارلیمانی نظام چلیا تے مارشل لا لگ گیا۔ مڑ ایوب دے خلاف لہر چلی تے ملک نوں اک واری فیر ستر وچ چوناں راہیں پارلیمانی نظام ول لیاندا گیا۔ ایس نظام دی حیاتی بوہت تھوڑی رہئی تے ستتر وچ جنرل ضیا نے مارشل لا لاگو کر کے اک واری پھیر اوہی ویہار چلا چھڈی جہیڑی ایوب خان نے چلائی رکھی سی تے جس پاروں ملک دو ٹوٹے ہو گیا سی۔ جنرل ضیا دے مرن مگروں ملک ٹٹن توں تے بچ گیا پر حال ایہہ ہو گیا سی بئی ہر فرقے نے اپنا اپنا لشکر تے مجاہد دھڑا بنا لیا سی۔ اٹھاسی وچ اک واری پھیر ملک دیاں باگاں موڑ کے پارلیمانی نظام لاگو کیتا گیا۔
ضیا دور وچ موجاں کرن والے لوکاں نوں پارلیمانی نظام چنگا نہ لگا تے اخیر پورے گیاراں ورھیاں پچھوں 99 وچ پارلیمانی نظام نوں کنج کے تے صدارتی نظام لے آوندا۔ نو سال ایس نظام نوں چھک دھرو کے چلایا گیا تے فیر ملک اک واری پارلیمانی نظام ول لیاندا گیا۔ دو ہزار اٹھ توں ہن تائیں گیارہ ورھے ہو گئے نیں جس وچ نظام اکو ای چلی جا رہیا اے۔
اوہ سجن جنہاں جنرل مشرف نال رل کے موجاں کیتیاں سن اوہناں نوں ہن لگدا اے بئی پارلیمانی نظام اوہناں دے وارے دا نہیں اے۔ پچھلے گیاراں ورھیاں وچ تن جماعتاں نوں واریاں تے سرکاری کرسی دے ہلارے دے دتے گئے نیں۔ تے ہن تھاؤں تھائیں ایہہ گل چلن لگ پئی اے بئی پارلیمانی نظام فیل ہو گیا اے اوس دی تھاں صدارتی نظام آؤنا چاہیدا اے۔ صدارتی نظام دے نال اسلامی دا تڑکا وی لایا جا رہیا اے۔
سواد والی گل ایہہ اے بئی اسلامی صدارتی نظام دی واج آ وی اوس پاسیوں رہئی اے جدھروں عمران خان نوں کوئی دیوتا بنا کے سرکار حوالے کرن دی لہر چلائی جاندی سی۔ کئیں ٹی وی اینکر جیہڑے ہر ویلے عمران نوں ملک لئی سب توں چنگا لیڈر آکھ دے سن اوہی ہن لوکاں کولوں معافیاں منگن لگ پئے نیں بئی اوہناں عمران دا پکھ مار کے بڑی وڈی غلطی کیتی سی۔ اوہی لوک ہن آکھن لگ پئے نیں بئی عمران بھانویں چنگا بندہ اے پر پارلیمانی نظام دیاں پابندیاں اوس نوں کم نہیں کر دے رہئیاں۔
اللہ جانے بئی ایہہ نظام نوں بدلن دے اوہلے وچ کیہ کرنا چاہیندے نیں۔ عمران خان نے پچھلے کجھ دیہاڑیاں وچ کئیں واری آکھیا اے بئی اٹھارویں ترمیم پاروں ملک دا مالی نقصان ہوئیا اے۔ سیانے لوک آکھدے نیں بئی ایہہ نظام بدلن دی جیہڑی گل اے اوس وچ عمران خان پوری طرح سیری اے تے اوہناں لوکاں دے نال رلیا اے جیہڑے نظام بدلنا چاہندے نیں۔
پاکستان ہر دس ورھے مگروں نظام بدلن دے تجربے کردا کردا ایتھوں تائیں اپڑ گیا اے۔ ہن تائیں جدوں وی صدارتی نظام ایس ملک وچ آیا تے اوس ویلے کوئی نہ کوئی انہونی ایس ملک تے ضرور ہوئی۔ ایوب دا دور ہووے تے بھانویں ضیا دا ہووے تے بھانویں مشرف دا دو ہووے۔صدارتی نظام وچ ایس ملک نال جو جو بیتیاں نیں ایس لئی ڈر ای لگدا اے بئی کوئی نواں ای چن نہ چڑھ جائے۔
924
sajjan aslam da eh lekh pm imran noo prhan chahi da sadday mulk wich sidarti nizam pwen woh ayub da ho yaa zi a ka yahya ka ho ya musharraf da eh mulk te lokai noo pharan te phaar pawan da kran bana je .
ودھیا