طارق عزیز بٹ:
ورلڈ بینک دے سابق ملازم عبدالحفیظ شیخ ہوراں نوں مشیرِ خزانہ، آئی ایم ایف دے حاضر ملازم رضا باقر ہوراں نوں گورنر سٹیٹ بینک جد کے اِک آڈٹ کمپنی دے مالک شبر زیدی ہوراں نوں ایف بی آر دا چئیرمین بنا دِتا گیائے۔ لگدائے 22 کروڑ لوکاں دے ملک دا پورا مالیاتی نظام ٹھیکے اَتے دے دِتا گیائے، صاحب بہادر دی مرضی جیہنوں چَاہون خزانے دی کُنجی اوہدے حوالے کَرن، اَسیں کون ہُنے آں کُجھ آکھن آلے۔ نالے ایہہ پہلی وار نئیں کہ عالمی مالیاتی اداریاں نال جُڑے بندیاں نوں پاکستان اندر اُچیچے سرکاری عہدیاں اَپر بٹھایا گیا ہووے، معین قریشی، شوکت عزیز، شوکت ترین، یاسین انور تے اشرف وتھرا ایہناں چ شامل نیں۔ 45 وَرھے دے ڈاکٹر رضا باقر دے گورنر سٹیٹ بینک بنن توں پہلاں آئی ایم ایف توں آؤن آلے ڈاکٹر محمد یعقوب، ڈاکٹر عشرت حسین اَتے ایشئین ڈویلپمنٹ بینک توں آن والی ڈاکٹر شمشاد اختر ہوراں وی عالمی اداریاں توں سِدھا پاکستان آ کے ایہہ نوکری سانبھی۔
ڈاکٹر باقر رضا نوں گورنر سٹیٹ بینک بنانا مسئلہ نئیں، وَڈا مسئلہ اوہ حالات ہین جنہاں چ آئی ایم ایف دے اِک حاضر ملازم نوں ایس عہدے تے بٹھایا جا رہیائے۔ موجودہ سرکار نے آئی ایم ایف کولوں قرض لین تے اوہدے ولوں شرطاں مِتھن توں پہلاں ای ملک اندر مہنگائی دا طوفان کھڑا کر دِتائے، گَڈی توں لَے کے سوئی تک ہر شے مہنگی ہو گئی اے، معیشت دا پہیہ اُکا رُک گیائے، ڈالر نوں پَر لَگے پئے نیں، وصولیاں گَھٹ گئیاں نیں، سارے ترقیاتی کَم ٹَھپ کر دِتے گئے نیں، صحت، تعلیم سَنے ہر شعبے دا بجٹ گَھٹ کر دِتا گیائے سوائے دفاع دے۔ 18ویں ترمیم پاروں وفاق تے صوبیاں خاص کر صوبہ سندھ وچکار کھچاء اے، ٹیکس وصولی اَتے مالی وسائل دی وَنڈ بارے وی رَولا اے۔ سرکار مخالف جماعتاں کَھپ پا رہیاں نیں کہ آئی ایم ایف نال کیتا جان والا معاہدہ پارلیمنٹ چ لیاندا جائے تاں جے عوام نوں حقیقت توں جانکاری ہو سکے۔ جاپدا اِنج ہے کہ نویں پیکیج ہیٹھ آئی ایم ایف توں جِناں قرص لیا جاسی اَگلے کُجھ ورھے دوران اونِی ہی رقم برابر نویں ٹیکس لائے جاسن۔
پاکستان 11 جولائی 1950ء چ آئی ایم ایف دا ممبر بنیا اَتے ہُن تائیں 21 واری آئی ایم ایف کُول جا چکیائے۔ 1988ء توں پہلے پاکستان تے آئی ایم ایف وچکار ہون والے معاہدے گَھٹ ویلے دی پَدھر اُتے ہوئے جنہاں نوں معاشی اصلاحات کرن دِیاں شرطاں نال نہیں سی جوڑیا گیا۔ مارشل لاء مُکن مگروں آؤن والی جمہوری سرکار نے آئی ایم ایف نال ‘سٹرکچلرل ایڈجسمنٹ پروگرام’ (ایس اے پی) شروع کیتا، ایہہ اوہ پروگرام اے جیہدے چ ڈاڈھی معاشی مشکلاں اندر پَھسے مُلکاں نوں اّچیچیاں شرطاں ہیٹھ نواں قرض دِتا جاندائے۔ پچھلے 31 ورھے دوران پاکستان تے آئی ایم ایف وچکار ہوون والا ایہہ 12واں ‘ایس اے پی’ ہوسی۔
آئی ایم ایف توں لَبھن والا قرض رُکن ملکاں دا ہی پیسہ ہوندائے جیہدے مطابق ہر ملک دا کوٹہ مِتھیا جاندائے، جے کوئی ملک کوٹے توں وَدھ قرض لینا چاہوے تاں ایہدے لئی معاشی اصلاحات کَرن بارے خاص شرطاں رَکھیاں جاندیاں ہین اَتے ایہہ شرطاں پُورنا ہی اوکھا کَم اے۔ پاکستان قرض لَے کے کَدے وی آئی ایم ایف دِیاں شرطاں پوریاں نئیں کر سکیا جس کارن نواں قرض لینا اوکھا ہُندائے جیہدے لئی پاکستان نوں ہر واری امریکی سفارش دی لوڑ پَیندی رہی پَر ایس واری امریکہ وی اَساڈا سفارشی نئیں، FATF دی تلوار وی سر اُتے لٹک رہی اے، شائد ایہناں ساریاں اوکڑاں کارن ای ایس واری آئی ایم ایف نال مذاکرات لئی آئی ایم ایف دی ٹیم نوں ای اَگے کیتا گیائے۔
