انڈیا دے زیر انتظام کشمیر وچ کرفیو، رکاوٹاں تے مواصلاتی نظام دی بندش کارن صحافیاں لئی جانکاری دیون وچ ڈاھڈی اوکڑاں آرہیاں نیں۔ ایس دے نال ای اخبار، ٹی وی تے ریڈیو لئی کم کرن والیاں نوں اک تھاں توں دوجی تے اپڑن وچ کئی خطرے ویکھنے پیندے نیں۔
سرینگر وچ بی بی سی دے نامہ نگار ریاض مسرور نے کجھ پترکاراں نال گل کیتی جیہڑے کشمیر وچ لنگھے اک مہینے توں بندشاں دے باوجود رپورٹنگ کر رہے نیں۔
بی بی سی نامہ نگار آپ وی مشکل وچ کم کرہے نیں کہندے نیں کہ ‘کشمیر دی صورتحال اتے رپورٹ کرنا نہ صرف مقامی صحافیاں لیی مشکل اے سگوں باہر دے بین الاقوامی اداریاں دے پترکاران لئی وی بوہت مشکل ہورہی اے۔
’کشمیر وچ پابندیاں ہیٹھ وڈا مسئلہ ایہہ پیش آندا اے کہ صحافی اپنا کم گھل نئیں پارہے کیوں جے انٹرنیٹ، ٹیلی فون بند نیں۔
ریاض مسرور دسیا کہ ’دوجا مسئلہ اے کہ جد صحافی کدھرے جاندے نیں تاں تھاں تھاں اتے ناکے تے مشکلاں دا سامنا کرنا پے ریہا اے۔
غیر ملکی ایجبسی دے نمائندے شون کئی دناں توں کشمیر وچ کم کر رہے نیں۔ اوہ سمجھدے نیں کہ ’ایتھے کم کرنا تقریباً ناممکن اے۔‘
’کل میں سوچ رہیا ساں جے مینوں حراست وچ لے لیا جائے تاں میں کسی نوں دس وی نئیں پاواں گا۔ ایہہ اک وڈا مسئلہ اے۔ سرکار کہندی سبھ کجھ نارمل اے۔ جدوں اسیں جاندے آں تے فوج پلس سانوں جاون نئیں دیندی۔ اوہ ساڈے توں بویت سارے سوال کردے نیں۔ کوئی فلم بناون نئیں دیندے۔
شون کہندا اے ماحول دی کشیدگی اک پاسے ایتھے ’کوئی آزادی نہیں۔‘
