بھارتی سکھ یاتریاں لئی کرتار پور لانگھا بناؤن واسطے حکومت علاقے دے لوکاں توں زورا زوری اوہناں دی جَدی پُشتی زِیویں خالی کرا رہی اے۔ کوٹھے خُرد پِنڈ دے لوکاں احتجاج کردیاں آکھیائے کہ ضلعی انتظامیہ ولوں پورے پِنڈ دے 6 سو وسنیکاں نوں فی الفور آپنے گھر چَھڈن دا حکم دِتا گیائے۔
پِنڈ دے اِک وسنیک حاجی ارشد دا آکھنا اے کہ لوکاں نوں پہلے کُجھ دَسیوں بغیر ای وَڈی مشینری لا کے اوہناں دِیاں فصلاں اُجاڑ کے سڑکاں بناؤنیاں چالو کر دِتیاں گئیاں نیں۔ اوہنے ایہ وی آکھیا پئی پِنڈ وَالیاں نوں ایہ وی نئیں پتہ کہ ایہ سرکاری بندے ہین یاں کوئی ہور؟
اِک ہور وسنیک محمد افضل دَسیا کہ سرکار نے کوٹھے خُرد تے ڈوڈھے پِنڈ دی1177 ایکڑ زمین اُتے قبضہ کر لیائے، اوتھے اُگیاں فصلاں وی اُجاڑ چھڈیاں نیں، اَساڈے گھراں نوں وی ڈَھاون دی تیاری کیتی جا رہی اے پر اَسانوں ہُن تائیں سرکار کولوں اِک پیسہ نئیں مِلیا۔
ڈوڈھے پِنڈ دے وسنیک اخلاق احمد آکھیا کہ لوکاں نوں ڈرا دھمکا کے زِیویں کھوئی جا رہی اے، اوس دی 10 ایکڑ زمین قبضے چ لَے لئی گئی اے، پِنڈ چ لگے 40 ٹیوب ویل توڑ بَھن دِتے گئے نیں، سینکڑے رُکھ وَڈھ دِتے گئے ہین اَتے لوکاں نوں لکڑی وی نئیں چُکن دِتی جا رہی۔
ڈپٹی کمشنر نارووال وحید اصغر دا آکھنا سی کہ منصوبے اُتے کم تیز کر دِتا گیائے تے سارا کم قنون دے مطابق ہوریائے، زمین دے مُل دا ٹیوا لایا جا رہیا اے تے فنڈز لبھن اُتے بہوں چھیتی لوکاں نوں اوہناں دے پیسے دِتے جاسن۔
437
