چیئرمین سینیٹ خلاف بے وسائی ٹورا ،کوئی پریشانی نئیں،سنجرانی

اسلام آباد:سرکار مخالف احتجاجی تحریک چلان لئی اپوزیشن دی 9 سیاسی جماعتاں دی 11 ممبراں دی رہبر کمیٹی نے چیئرمین سینیٹ نوں ہٹان دا فیصلہ کیتا سی، چیئرمین سینیٹ صادق سنجرانی خلاف تحریک عدم اعتماد اپوزیشن ممبراں نے سیکریٹری سینیٹ دے دفتر وچ جمع کرادتی۔
پیپلزپارٹی آگو شیری رحمان دسیا کہ چیئرمین سینیٹ نوں ہٹاون دی قرارداد اتے 44 ارکان نے دستخط کیتے نیں۔
جیہدے وچ آکھیا گیا کہ صادق سنجرانی ایوان دےممبراں دا وساہ کھوچکے نیں، چیئرمین سینیٹ دے نگران دی حیثیت وچ اعتماد نئیں رکھدے۔اپوزیشن نے چیئرمین سینیٹ دی سیٹ نون لیگ نوں دیون اتے اتفاق کیتا اے۔
رہبر کمیٹی دااگلا اجلاس 11 جولائی نوں ہووے گا، جیہدے وچ نویں چیئرمین سینیٹ دے نام دااعلان کیتا جاوے گا۔
ادھر چیئرمین سینیٹ صادق سنجرانی دا آکھنا اے اوہناں نوں اپنے خلاف اپوزیشن دی تحریک عدم اعتماد دی قرارداد جمع ہوون اتے کوئی پریشانی نئیں،تے اوہ کسے صورت استعفیٰ نئیں دیون گے۔ صحافیاں نال گل بات کردیاں صادق سنجرانی نے آکھیا تحریک عدم اعتماد جمہوری عمل اے،اوہ بیٹھے نیں، تے اپنا کم وی کررہے نیں۔ جدپچھیا کہ بلاول بھٹو آپ توں استعفے دی منگ کیتی اے، اوہناں دا جواب سی میں کسے صورت استعفیٰ نئیں دیواں گا۔