پشاور (سجن رپورٹ) خیبر ٹیچنگ ہسپتال دے ڈاکٹر اُتے صوبائی وزیر صحت دے عملے ولوں مبینہ تشدد کرن خلاف صوبائی دارالحکومت پشاور دے ہسپتالاں دے ڈاکٹراں دی ہڑتال اَج دوجے دیہاڑ وی جاری رہی۔ خیبر ٹیچنگ ہسپتال دی انتظامیہ نے ایسوسی ایٹ پروفیسر ضیا آفریدی خلاف صوبائی وزیر صحت ہشام تے اوہناں دے سکیورٹی گارڈز نال جھگڑے تے تشدد دا مقدمہ درج کروا دِتا جد کہ ڈاکٹر ضیا آفریدی اُتے وزیر دے گارڈز دے تشدد دا مقدمہ ڈاکٹراں دی ہڑتال دے باوجود درج نہیں کیتا گیا۔ ڈاکٹراں نے لیڈی ریڈنگ ہسپتال وچ جلوس کڈھیا، ڈی ایس پی دے دفتر جا کے وی احتجاج کیتا پَر پولیس نے ایہہ کہہ کے وزیر دے گارڈز خلاف مقدمہ درج نہیں کیتا کہ میڈیکولیگل رپورٹ بِنا ایف آئی آر درج نہیں کیتی جا سکدی۔ ڈاکٹر ضیا آفریدی خلاف درج کیتے گئے مقدمے وچ ہسپتال دے ڈائریکٹر نے الزام لایا کہ پالیسی بورڈ دی بیٹھک دوران ڈاکٹر ضیا تے ڈاکٹراں دے اِک گروپ نے اندر وَڑھ کے بیٹھک رکوا دتی، وزیر صحت اُتے حملہ کیتا تے ڈاکٹر نوشیرواں برکی نوں گندے انڈے مارے۔ اِک پاسے ڈاکٹر اپنی ہڑتال پورے صوبے وچ کھلار رہے نیں تے دوجے پاسے حکومت نے اوہناں نوں آج شام تائیں ہڑتال ختم کرن دی ڈیڈ لائن دتی اے. ہڑتال کارن دوجے شہراں توں آون والے مریضاں تے اوہناں دے وارثاں نوں چوکھی تکلیف دا سامنا کرنا پیا۔
432
