پشاور (سجن رپورٹ) خیبر پختونخوا سرکار نے مفتی پوپلزئی دی حمایت کردیاں صوبے چ (اج) منگل نوں عید مناون دا اعلان کر دِتا۔ وزیر اطلاعات شوکت یوسفزئی دا کہنا اے کہ صوبے بھر توں شہادتاں مِلن مگروں ایہہ فیصلہ کیتا گیائے۔ گورنر کے پی شاہ فرمان تے وزیراعلیٰ محمود خان اج گورنر ہاؤس چ عید دی نماز پڑھن گے۔ صوبائی وزیر اطلاعات دَسیا کہ فاٹا صوبے چ رَل چُکیائے تے اوتھوں وی چوکھیاں شہادتاں مِلیاں ہین ایس لئی صوبے دے لوکاں نال ایکے دے اظہار لئی اکٹھیاں عید منائی جائے گی۔ اوہناں آکھیا کہ پورے ملک چ اِک ای روز عید منان لئی مفتی پوپلزئی نوں مرکزی رویت ہلال کمیٹی دا چئیرمین بنایا جائے۔
دوجے پاسے مفتی شہاب الدین پوپلزئی دی صدارت ہیٹھ مسجد قاسم علی خان دی مقامی رویت ہلال کمیٹی دی بیٹھک ہوئی۔ کمیٹی نے چَن نظر آؤن تے اج عید منان دا اعلان کیتا، ایس کمیٹی نوں 112 توں وَدھ شہادتاں مِلیاں۔ ایس توں پہلاں شمالی وزیرستان چ چَن ویکھن دِیاں شہادتاں مِلیاں جتھے 10 لوکاں شہادت دِتی ایس لئی پورے وزیرستان چ وی اج عید منائی جاسی۔
443
