پاکستان پہنچ توں اَدھا ٹیکس اکٹھا کر رہیائے، عالمی بینک

اسلام آباد (سجن رپورٹ) پاکستان آپنی پہنچ دا صرف اَدھا ٹیکس اکٹھا کر رہیا اے۔ ورلڈ بینک دی تازہ رپورٹ وچ آکھیا گیا اے کہ پاکستان اکھٹے کیتے جان والے ٹیکساں دا صرف ادھا ٹیکس اکٹھا کر رہیا اے۔ پاکستان ریونیو موبیلائزیشن پراجیکٹ دے ناں دی رپورٹ وچ کہیا گیا اے پئی پاکستان کول نویں ٹیکس لائے بغیر اَتے پہلے توں لگے ٹیکساں دا ریٹ ودھائے بغیر ٹیکس اکٹھا کرن دی بہت طاقت اے۔ جنہاں تے ٹیکس لاگو اے صرف اوہو اکٹھا کر لیا جائے تے ریونیو دوگنا ہو سکدا اے، جس دا مطلب اے ٹیکساں دی موجودہ شرح نوں جی ڈی پی دے 13 فیصد توں 26 فیصد تک پہنچایا جاسکدا اے۔ رپورٹ وچ ایہہ وی دسیا گیا اے کہ پیداواری شعبے دے مقابلے تے سیوا (خدمات یا سروسز) دے شعبے وچ ٹیکس اکٹھا کرن دا گھاٹا بہت چوکھا اے، ایسے طرحاں سیلز ٹیکس وچ وی انکم ٹیکس دے مقابلے تے گھاٹا بہت ودھ اے۔ رپورٹ دے انوسار ٹیکس اکٹھا کرن دا حوصلہ نہ ہون دے نال نال قانونی خامیاں وی گھٹ ٹیکس اکٹھا ہون دا کارن ہین۔ قانونی خامیاں وچ بے نامی لین دین، پرائز بانڈز اَتے اُنہاں توں اکٹھے کیتے گئے پیسیاں بارے سوال جواب نہ کیتا جانا اے۔ دوجے ملکاں توں آون والے پیسے بارے ٹیکس اتھاریٹیز نوں سوال جواب کرن دا اختیار نہ ہونا، غیر منقولہ جائیداد اَتے ٹیکس دی شرح بہت گھٹ ہون دی وجہ توں رئیل اسٹیٹ دے کاروبار وچ کالا دھن رَلنا وی وڈیاں قانونی خامیاں وچ شامل نیں۔