اسلام آباد: انسانی اسمگلنگ وچ ملوث پاکستانیاں دی فہرست تیار کر دتی گئی اے ایس فہرست وچ انسانی اسمگلنگ دے 160سرگرم اہلکاراں دے ناں تے پتے شامل نیں۔ وزیر اعظم شہباز شریف دی ہدایت تے انسانی اسمگلنگ وچ ملوث پاکستانیاں دی فہرست تیار کر دتی گئی اے۔
رپورٹ وچ دسیا گیا اے کہ اداریاں دی فہرست وچ 160سرگرم انسانی اسمگلراں دے ناں پتے شامل نیں جہناں وچوں 39پنجاب تے 34سندھ دے نیں۔
رپورٹ وچ دسیا گیا اے کہ خیبر پختونخوا وچ 50، بلوچستان وچ 31 تے اسلام آباد وچ 6 سمگلر سرگرم نیں جدکہ 15 سمگلراں دے ناں پاسپورٹ کنٹرول لسٹ تے پی این آئی لسٹ وچ شامل کر دتے گئے نیں۔
رپورٹ وچ آکھیا گیا اے کہ ایہ سمگلر پاکستان تے دوجے ملکاں توں انسانی اسمگلنگ وچ ملوث نیں 4 سمگلر ایس ویلے پاکستان وچ موجود نیں، تن لیبیا وچ، اک انگلینڈ تے اک امارات وچ موجود نیں۔
رپورٹ دے مطابق 6ہومن سمگلرز دے موجودہ مقام دا حالے تیکر پتہ نہیں چل سکیا، حالانکہ سارے سمگلراں دے بینک اکاؤنٹس منجمد کر دتے گئے نیں، جدکہ اوہناں دے پاسپورٹ تے شناختی کارڈ وی بلاک کر دتے گئے نیں۔
