پاکستان نوں آئی ایم ایف کولوں امریکی تعاون نال قرض لَبھا، ایلس ویلز

جنوبی ایشیا لئی امریکہ دی سابق معاون نائب وزیر خارجہ ایلس ویلز آکھیا اے کہ پاکستان نوں امریکہ دے تعاون نال آئی ایم ایف کولوں قرض لَبھا۔ پاکستان نال سانگے ہُن مالی امداد توں ہَٹ کے تجارت وَل وَدھ رہے نیں۔ اوہناں کُھل کے آکھیا کہ جیش محمد وَرگیاں دہشت گرد تنظیماں نوں برداشت نئیں کیتا جائے گا۔ ایشیا پیسفک تے جوہری ہتھیاراں دا پھیلاؤ روکن بارے کانگریس دی ذیلی کمیٹی دی سنوائی دوران امریکہ دے مالی ورھے 2020ء دے بجٹ وچ جنوبی ایشیا لئی مالی امداد دا ذکر کر دیاں ایلس ویلز دَسیا کہ پاکستان لئی آؤندے مالی ورھے دے امریکی بجٹ وچ اقتصادی تعاون دی مد ہیٹھ 7 کروڑ ڈالر رکھے جاون دی صلا دِتی جا رہی اے، پَر اوہناں آ کھیا کہ پاکستان لئی امریکہ دا سبھ توں وڈا مالی تعاون بین الاقوامی مالیاتی فنڈ (آئی ایم ایف) راہیں اوہنوں لَبھن والا 6 ارب ڈالر دا پیکج اے جیہڑا امریکی تعاون بغیر ممکن نئیں سی ہو سکدا۔ ذیلی کمیٹی دے چئیرمین بریڈ شرمن نے ایس بارے تشویش دا اظہار کیتا کہ جے پاکستان آئی ایم ایف دا قرضہ واپس نہ موڑ سکیا تے ایس کارن امریکی ٹیکس دہندگان نوں اِک ارب ڈالر دا گھاٹا پوسی۔
ایلس ویلز آکھیا کہ پاکستان دی 5 کروڑ دے لگ بھگ آبادی والے صوبے سندھ وچ سندھی زبان دے ودھا لئی امریکہ بھرواں کم کر رہیا اے تاں جے سندھی زبان بولن والی آبادی نال جُڑت ودھائی جا سکے۔ ایس موقعے تے بریڈ شرمن دا کہنا سی کہ امریکہ نوں سندھی زبان وچ نشریات شروع کرنا چاہیدیاں نیں تاں جے سندھ دی ساری لوکائی تائیں سنیہا اَپڑایا جا سکے۔
کمیٹی ارکان نے بھارت ولوں روس توں S 400 میزائل دفاعی پروگرام خریدن دے منصوبے بارے تشویش دا اظہار کیتا۔ ایلس ویلز دا کہنا سی کہ بھارت گذرنے 10 ورھے دوران دفاعی ساز و سامان دی خریداری لئی وکھو وَکھ ملکاں نال رابطے کر رہیا اے، پر ٹرمپ سرکار بھارت دی دفاعی لوڑاں نوں چنگی طرحاں سمجھ دی اے تے ہُن بھارت نال امریکہ دی سانجھی فوجی مشقاں دنیا بھر وچ کسے وی ملک نالوں چوکھیاں ہین جیہدا 10 ورھے پہلے تائیں سوچیا وی نئیں سی جا سکدا۔