لہور (مونیٹرنگ ڈیسک) یورپی کمشن نے پاکستان تے 22 ہور ملکاں نوں اوہناں ملکاں دی بلیک لسٹ وچ شامل کر دتا اے جنہاں نوں دہشت گردی دی فنانسنگ تے منی لانڈرنگ ڈکن لئی سنجیدہ کنٹرول دا نظام نہ رکھن پاروں پورپی یونین بلاک لئی خطرہ ثابت ہو سکدے نیں۔ رائٹرز خبر یجنسی نے سٹراسبرگ توں رپورٹ کیتا اے کہ بدھ نوں یورپی کمشن دے اک افسر نے دسیا بئی سعودی عرب، پاناما تے کئی ہور ملکاں نوں بلیک لسٹ وچ رکھ دتا گیا اے۔ اوہناں وچ افغانستان، امریکن ساموا، بہاماس، بوٹسوانا، شمالی کوریا، گھانا، گوام، ایران، عراق، لیبیا، نائجیریا، پاکستان، پاناما، پورٹوریکو، ساموا، سعودی عرب، سری لنکا، شام، ٹرینیڈاڈ، ٹوباگو، تیونس، امریکن ورجن آئی لینڈز تے یمن شامل نیں۔ ایس بلیک لسٹ وچ شامل ملکاں نوں یورپی یونین دے ملکاں نال مالیاتی سانگیاں وچ اڑیکے تے مشکلاں پین دا ڈر اے۔ یورپی یونین بلاک دے بینک ایہناں بلیک لسٹ ملکاں نال تعلق رکھن والیاں نال کسی نال لین دین وچ دوجے ملکاں توں ودھ نگرانی رکھن گے۔
469
