لہور (سجن رپورٹ) ایف آئی اے نے لہور سَنے دوجے کئی شہراں چ کارروائی کر کے 8 چینی باشندے گرفتار کر لئے۔ اوہناں تے الزام اے کہ اوہ ایجنٹاں نال رَل کے پاکستانی کُڑیاں نال وِیاہ کرن بعدوں اوہناں نوں بلیک میل کر دے تے اوہناں توں جسم فروشی دا دھندہ کرواندے سن۔ کارروائی لہور، فیصل آباد، گوجرانوالہ تے دوجے کئی شہراں اندر کیتی گئی، ایف ائی اے نے شادی سکینڈل چ ملوث 10 چینی مُنڈے ہُن تائیں گرفتار کیتے نیں۔ چینی گروہ نے پاکستانی معصوم کُڑیاں نال جعلی وِیاہ دا ریٹ 10لاکھ روپے مِتھ رکھیا اے۔ چینی باشندے پاکستان چ موجود آپنے گروہ، جیہدے چ پاکستانی وی شامل نیں، نوں رقم دے کے جعلی ویاہ کر دے تے کٗڑیاں نوں چین کَھڑ کے اوہناں دے جسمانی اعضاء ویچدے تے کُجھناں توں زورا زوری جسم فروشی دا دھندہ کراؤندے۔
دوجے پاسے عالمی تنظیم ہیومن رائٹس واچ ولوں جاری کیتی گئی تازہ رپورٹ چ تشویش دا اظہار کر دیاں دَسیا گیا اے کہ وَڈی گنتی چ پاکستانی کُڑیاں نوں چینی مُنڈیاں نال وِیاہ کے چین سمگل کیتے جان دا انکشاف ہویائے۔ بی بی سی مطابق پچھلے اِک ورھے توں چوکھے چینی مُنڈے وِیاہ کرن لئی پاکستان دے صوبہ پنجاب آ رہے نیں اَتے ایس دوران پنجاب دے وکھو وکھ شہراں چ لگ بھگ 700 کُڑیاں دے وِیاہ چینی مُنڈیاں نال ہوئے نیں۔ وِیاہ کر کے کُڑیاں نوں چین کَھڑیا جاندائے جیہدا مقصد ایہناں نال ازدواجی رشتہ اُسارنا نئیں ہوندا سگوں ایہہ عالمی پَدھر اُتے جسم فروشی دا اِک ذریعہ اے۔ عام طور تے مسیحی کُڑیاں نال وِیاہ کیتا جاندا اے تے قنون دے تحت ایہدا اندراج وی ہوندا اے۔ رپورٹ مطابق پاکستان چ ساہمنے آؤن آلے واقعات ایشیاء دے پنج ہورناں ملکاں نال مِلدے جُلدے ہین۔
414
