وڈے سیلاب دا خطرہ

اسلام آباد (نمائندہ سجن)
ایس ورھے پاکستان چ مون سون رُت دوران ‘سُپر’ توں ‘میجر فلڈ’ آؤن دا خطرہ اے۔ موسمیاتی ماہراں ایہدا کارن رُت وار چوکھی برفباری اَتے موسمی بدلاؤ دَسیا اے۔ ایہ گل سرکاری عہدیداراں نے قومی اسمبلی دی پانی بارے سٹینڈنگ کمیٹی نوں جانکاری دیندیاں آکھی۔ اوہناں دا دَسناں سی کہ آ سکن والے ایس وڈے ہڑھ دی تباہی تے نقصان توں بچن لئی ہُن توں لوڑیندی تیاری کرن اَتے فنڈز وکھرے رکھن دی لوڑ اے۔
رکن قومی اسمبلی نواب یوسف تالپور دی صدارت ہیٹھ ہوئے اجلاس نوں وزارتِ آبی وسائل دے قائم مقام سیکرٹری سید مہر علی دَسیا کہ ایس ورھے پہاڑی علاقیاں چ ہوون آلی عام نالوں چوکھی برفباری دے پگھلن نال دریاواں اندر ڈھیر پانی آ سکدئے جیہدے کارن ملک چ وڈا ہڑھ آؤن دا ڈر اے۔ اوہناں ایس خطرے نال نبڑھن لئی کمیٹی توں 15 ارب روپے جاری کرن دی منگ کیتی۔ اوہناں ہور دَسیا کہ پچھلے 60 ورھیاں دوران ہڑھ پاروں ملک نوں 19 ارب ڈالر دا نقصان ہویائے جد کہ 2010ء اِچ آئے ہڑھ بعدوں ملک نوں خالی ہُن تائیں سِدھا ساواں 19 ارب ڈالر دا نقصان ہو چکیائے۔