نوازشریف لندن روانگی لئی تیار

ڈاکٹراں دی ہدایت مگروں سابق وزیراعظم نواز شریف نوں علاج لئی لندن لے جایا جارہیا اے، اوہناں دے نال شہبازشریف تے مریم نواز دا پتر ہووے گا، مریم نواز پاسپورٹ نہ ہوون کارن نئیں جاسکن گئیاں، لندن دے ہارلے سٹریٹ ہسپتال وچ اوہناں دے ٹیسٹ تے علاج ہووے گا ایس ہسپتال وچ کلثوم نواز دا وی علاج ہویا سی۔
شہباز شریف نے سابق وزیراعظم نواز شریف نوں لندن جاکے علاج کران اتے راضی کرلیا اے، دی نیوز رپورٹ مطابق لندن توں دسیا گیا اے پئی اپوزیشن لیڈر تے نون لیگ دے صدر نے وڈے بھرا نوں سروسز ہسپتال توں گھر لے جاون توں پہلاں ای، ایس گل اتے منالیا پئی اوہناں نوں برطانیہ جانا چاہیدا اے۔ ایہہ وی دسیا گیا کہ نواز شریف پنج ہفتے اوتھے ہسپتال اپنے ٹیسٹ تے علاج کراون گے۔ اپنے اک بیان وچ شہباز شریف کہیا سی کہ پارٹی لئی اپنے قائد دی صحت توں ودھ کوئی شے نئیں۔ ایس لئی ڈاکٹراں دے مشورے اتے اوہناں نوں جے باہر لے جاون دی لوڑ پئی تاں اوہ وی کیتا جاوے گا۔ رپورٹ مطابق شہباز شریف نے لندن وچ ڈاکٹراں نال پہلاں ای صلاح کرلئی اے تے اوہ نواز شریف نوں نال لے کے ٹر جاون گے۔