نواز شریف ضمانت اتے رہا۔شہباز باہر جاون دی اجازت

سریم کورٹ دے حکم اتے پچھلے وزیراعظم نواز شریف نوں علاج لئی ضمانت تے لہور دے کوٹ لکھپت جیل توں رہائی مل گئی۔
26 مارچ دی دوپیراں نوں چیف جسٹس آصف سعید کھوسہ دی اگوائی ہیٹھ تن ممبری بینچ فیصلہ دتا۔ اوہناں وکیل خواجہ حارث توں پچھیا ایہہ کیویں پتہ چلے گا جیہڑا خط لندن دے ڈاکٹر ککھیا اوہ نواز شریف دی صحت بارے اے۔ دوجے جیل وچ اوہ دبا محسوس کردے نیں تے کیہ گارنٹی اے اوہ باہر جاکے ٹینشن وچ نئیں ہوون گے۔

عدالت فیصلے وچ آکھیا چھ ہفتے مگروں ضمانت ودھائی جاسکدی اے۔ اسیں ہائیکورٹ نوں حکم دیندے آں اوہ کیس سنے۔
نواز شریف نوں سپریم کورٹ ولوں وڈا ریلیف مل گیا۔ عدالت نے اوہناں دی بیماری دی وجہ توں ضمانت اتے چھڈن دی درخاست من لئی تے نواز شریف نوں علاج لئی چھ ہفتے لئی ضمانت تے رہا کرن دا حکم دے دتا۔ فیصلے وچ ایہہ وی دسیا گیا اے بئی اوہ ضمانت اتے رہائی دے دوران ملک توں باہر نئیں جا سکدے۔ چھ ہفتے لئی سزا معطل کرن دے فیصلے وچ آکھیا گیا اے کہ اگر نواز شریف ڈیڑھ مہینے بعد پیش نہ ہوئے تے اوہناں نوں گرفتار کر کے جیل گھلیا جاوے گا۔ نواز شریف دی طبی بنیاد اتے ضمانت لئی اوہناں کولوں دو ضمانتی منگے گئے تے 50 50 لکھ روپے دے دو مچلکے جمع کران دا حکم دتا گیا۔
شہباز نوں پرواز دی کھل۔۔۔ناں ای سی ایل تو باہر۔۔۔۔ لہور ہائیکورٹ نے مسلم لیگ نون دے صدر تے اپوزیشن لیڈر شہباز شریف دا ناں ایگزٹ کنٹرول لسٹ وچوں کڈھن دا حکم دیندیاں آکھیا بئی صرف الزامات دی وجہ توں کسے دا نال ای سی ایل اتے نئیں پایا جا سکدا۔ نیب دے وکیل نے میاں شہباز شریف دا ناں ای سی ایل وچوں کڈھن دی مخالفت کیتی تے عدالت ریمارکس دتے کہ اوہ الزام بارے ثبوت وی لیاوے، نرے الزامات اتے کسے دا ناں کیویں ای سی ایل اتے سٹیا جا سکدا اے۔