میڈیا زور تے زر نال کنٹرول کیتا جاندا

میڈیا تے میڈیا اونرشپ مانیٹر دے نام چھپن والی تازہ تحقیق وچ پاکستان نوں میڈیا پلورلزم دے حوالے نال اک خطرناک ملک قرار دتا گیا اے۔
تحقیق مطابق پاکستانی میڈیا دے چار وچوں تن میڈیمز دے جیہڑے میڈیا ہاؤس 50 فیصد توں ودھ ویکھن والیاں تیک اپڑدے نیں، ٹیلی ویژن چینلاں وچوں جیو، اے آر وائی، پی ٹی وی تے سما ٹی وی جدکے اخباراں وچوں جنگ، ایکسپریس، نوائے وقت ، خبریں تے آن لائن میڈیم وچ ڈان ڈاٹ کام، جنگ گروپ، ایکسپریس گروپ تے ڈیلی پاکستان شامل نیں،جیہڑے پنجاہ فیصد توں ودھ پڑھن تے ویکھن والیاں نوں کور کردے نیں۔
ریڈیو کیٹیگری وچ پہلے چار ریڈیو چینلز 35 فیصد سنن والیاں نوں کور کردے نیں۔ جنہاں وچ ایف ایم 100 پاکستان، ریڈیو آواز، ایف ایم مست 103 تے چوتھے نمبر اتے ایف ایم 101 تے ریڈیو پاکستان شامل نیں۔
ایس تحقیق مطابق تینوں میڈیمز وچ وکھو وکھ ملک دے پنجاہ فیصد توں ودھ ویکھن والے نرے چار وڈے میڈیا دے ادارے کور کردے نیں تاں جے اینہاں چار اداریاں دے مالکان اتے زور یا پیسے نال دباو پایا جاوے تاں بوہتے لوکیں کنٹرول کیتے جاسکدے نیں۔
رپورٹ مطابق پاکستان وچ وڈھی مڈھ رکھدیاں میڈیا نوں مالکانہ حق چاہئیدے نیں تاں جے خبر دے ذریعے نوں بہتر بنایا جا سکے۔
اس تحقیق وچ دلچسپ گل ایہہ وی اے کہ اکثر میڈیا ہاؤسز مالکان بارے پاکستانی لوکاں کول کوئی جانکاری نئیں اے۔
ایس پرچول بارے اسلام آباد وچ اک نشست ہوئی ،جیہدے وچ سنیئر صحافیاں وی شرکت کیتی۔
مظہر عباس دا آکھنا ا کہ پاکستانی میڈیا ایک طاقتور میڈیم ہون دے باوجود ہالے وی کمزور اے۔
میڈیا طاقتور ہوون دے باوجود وی بوہت زیادہ ماڑا ہوگیا اے۔ جے تہاڈا چینل بند ہوجاوے تاں تسیں اپنا چینل اوس ویلے تیک نئیں کھول سکدے جد تیک تسیں معافی نئیں منگ لیندے۔
ایہہ تحقیق عالمی صحافتی تنظیم رپورٹرز ود آؤٹ بارڈرز تے فریڈم نیٹ ورک پاکستان مشترکہ طور اتے جاری کیتی اے۔