لہور (سجن رپورٹ) مسلم لیگ نون نے قومی اسمبلی دی پبلک اکاؤنٹس کمیٹی دا چیرمین رانا تنویر نوں نامزد کر دتا اے تے قومی اسمبلی وچ پارلیمانی لیڈر خواجہ آصف علی نوں بنا دتا اے۔ مسلم لیگ نون پارلیمانی پارٹی دا اجلاس آج اسلام آباد وچ ہوئیا جیہدے بعد پارٹی دی ترجمان مریم اورنگزیب نے پارٹی اجلاس دے فیصلیاں بارے دسیا۔ اوہناں کہیا کہ اپوزیشن لیڈر اجے وی شہباز۔شریف ہی نیں، شہباز شریف نوں اپوزیشن لیڈر دے عہدے توں نہیں ہٹایا جا رہیا۔
چیتے رہوے کہ اپوزیشن لیڈر شہباز شریف دی لندن توں پاکستان واپسی دا شیڈول تبدیل ہوون تے اوہناں دے پبلک اکاؤنٹس کمیٹی دی سربراہی چھڈ دین نال بعض لوکاں ایہہ گلاں کرنیاں شروع کر دتیاں نیں کہ شہباز شریف ہن پاکستان واپس نہیں آون گے تے نواز شریف نوں وی کجھ دن بعد علاج لئی باہر بھیج دتا جاوے گا۔ مریم اورنگزیب نے اج پارلیمانی پارٹی دے اجلاس دے بعد صحافیاں نوں دسیا کہ پارلیمانی پارٹی نے پی اے سی دے چیرمین رانا تنویر نوں بناون تے پارلیمانی لیڈر خواجہ آصف نوں بناون دے فیصلے میاں نواز شریف دی صلاح نال کیتے۔
