سمجھوتہ ایکسپریس وچ بمب دھماکے دے چاروں ملزم بری کر دتے گئے۔
نویں دلی( سجن رپورٹ) بھارت دے صوبے ہریانے وچ نیشنل انویسٹی گیشن ایجنسی دے خصوصی عدالت نے سمجھوتہ ایکسپریس نوں بمب نال اڈان دے چار ملزماں نوں بری کر دتا اے۔
ایس توں وکھ اک پاکستانی رحیلہ وکیل ولوں گیارہ مارچ نوں دتی گئی اک درخواست نوں وی عدالت نے رد کر دتا اے۔
عدالت نے اپنے فیصلے وچ آکھیا اے بئی نیشنل انویسٹی گیشن ایجنسی اپنے دعوے نوں ثابت کرن وچ ناکام رہئی اے تے ملزماں نوں شک دا فائدہ دے کے بری کیتا جا رہیا اے۔
سمجھوتہ ایکسپریس وچ دلی توں لہور آندیاں 18 فروری 2007 وچ اوس ویلے بم دھماکہ ہوئیا سی جدوں گڈی ہریانے صوبے سے علاقے پانی پت اپڑی سی۔ ایس دھماکے وچ 70 جی مارے گئے سن۔ مرن والے جیاں وچ 43 پاکستانی شہری سن۔
بھارتی عدالت دے ایس فیصلے تے پاکستان نے بھارتی ہائی کمشنر نوں دفتر خارجہ سد کے احتجاج کیتا تے آکھیا بئی سارے ملزماں جنہاں وچ انتہا پسند تنظیم آر ایس ایس دا کارندا سوامی اسیم آنند وی شامل اے نوں بری کرنا نندیا جوگا اے۔
قائم مقام سیکریٹری خارجہ آکھیا بئی پاکستان پہلوں ای بھارت نوں کہندا رہیا بئی مقدمہ ٹھیک طریقے نال نہیں چلایا جا رہیا۔
468
