سعودی عرب چ 37 بندیاں دے سر قلم

ریاض (سجن رپورٹ) سعودی عرب چ اِک ہی دیہاڑ 37 بندیاں دے اکٹھیاں سر لاہ دِتے گئے اَتے اوہناں وچوں اِک دی لاش تے سر کھمبے اُتے ٹنگ دِتا گیا جتھے او تِن چار گھنٹے ٹنگیا رہیا۔ سزا پان آلیاں وچوں چوکھے شیعہ مسلک نال تعلق رکھدے سن اَتے ایہناں چ اِک 15 ورھے دا مُنڈا وی رَلتی سی، جنہاں خلاف بغاوت، دہشت گردی، افراتفری پھلاؤن، دشمن نال رَل کے سازش اَتے سیکیورٹی فورسز تے حملہ کرنے دے الزامات سن۔ ایمنیسٹی انٹرنیشنل موجب ایہہ سزاواں پچھلے دیہاڑ دارالحکومت ریاض، مکہ، مدینہ سَنے دوجے کئی شہراں اندر دِتاں گئیاں۔ جنوری 2016ء چ 47 “مجرماں” دے اکٹھے سر وڈھن مگروں اِک ہی دیہاڑ سر وَڈھنے دی ایہہ وڈی کاروائی اے۔ چیتے رہوے کہ سعودی قانون تحت کسے ملزم نوں وکیل کرنے دا حق نئیں، پولیس دے بیان تے گواہی نوں ہی اُچیچا منیا جاندئے اَتے سزاواں تے مقدمیاں بارے انصاف دے عالمی اصول پورے نئیں کِتے جاندے۔