لہور (سجن رپورٹ) پاکستانی روپے دی قیمت ڈالر دے مقابلہ اُتے اَج اِک دیہاڑ چ 6 روپے ہور گھٹ گئی تے انٹر بینک وچ ڈالر 148 روپے دا وِکیا، تاریخ اِچ ڈالر دا ایہہ سبھ توں چوکھا مُل اے۔ پچھلے دیہاڑے ڈالر دی قیمت 141 روپے 50 پیسے سی تے اَج جمعرات نوں سویرے کاروبار شروع ہوون دے بعد انٹر بینک وچ ڈالر دی قیمت وَدھ کے 148 روپے تائیں اَپڑ گئی۔ روپے دی قیمت سوموار توں لگاتار ڈِگ رہی اے پر اَج ایہدے وچ اِک ہور تواریخی کمی اوس ویلے ہوئی اے جدوں اِک دیہاڑ پہلاں ہی وزیر اعظم نے مشیر خزانہ حفیظ شیخ دی آگوائی ہیٹھ روپے دی قیمت گھٹن دے عمل نوں ڈَکن لئی اِک کمیٹی بنائی۔ شام نوں سٹیٹ بینک ولوں دسیا گیا پئی انٹر بینک وچ ڈالر دی قیمت 146 روپے ہے۔ کرنسی ایکسچینج ڈیلراں دا کہنا اے کہ آئی ایم ایف نال پاکستانی حکومت دے معاہدے بعد آس کیتی جا رہی سی کہ روپے دی قیمت گھٹائی جائے گی۔ کئی دِناں توں مارکیٹ وچ ڈالر دی تھوڑ اے تے لوک دھڑا دھڑا ڈالر خرید رہے نیں۔
384
