(اسلام آباد سجن ڈیسک ) پنجاب دیاں ویٹنیریری یونیورسٹیاں دے ڈنگر ڈاکٹر گلی محلے دے صحت مند بےزبان کتیاں نوں غیر اخلاقی تے مکارانہ طریقیاں نال اپنی ریسرچاں تے تجربیاں لئی بے دردی نال چیر پھاڑ رھے نیں .جانوراں پشواں دی راکھی کرن والی اک سماجی تیظیم ( اے .سی . ایف ) دی ایکٹویسٹ انیلہ دا آکھنا اے کہ اوھناں یونیورسٹی دے وائیس چانسلراں اگے پالتو کتیاں نال خون دی ھولی کھیڈن والے ڈنگر ڈاکٹراں دی ایس مکارانہ تے بد اخلاقی دا ماملا اگے رکھیا اے .اس توں اڈ اوھناں دا آکھنا سی پئی کیہ اس ماملے نوں وفاقی سطح اتے چکن دی لوڑ اے .
اک مقامی تنظیم وچ کرن والی این جی او دی سر کڈھویں ایکٹؤیسٹ عادلہ بٹ ھوراں دا آکھنا اے کہ گلی محلے دے کتیا ں نوں اساں روٹی پانی دے نھیں سکدے الٹا اوھناں دیاں زندگیاں نال ایہ پڑھیار ڈنگر ڈاکٹر انھے واہ موت دا کھلواڑ کررھے نیں اوھناں آکھیا کہ ایہ پڑھیار ڈنگر ڈاکٹر کتیاں اتے تجربے توں بعد ایھناں نوں مرن لئی کھلے اسمان تھلے مرن لئی چھڈ دیندے نیں . عادلہ بٹ ھوراں دا آکھنا سی کہ دنیا دے ترقی یافتہ ملکاں وچ اجیئے تجربات تے ریسرچ ڈمی جانوراں اتے کرواندے نیں پر پنجاب دیاں رفاہ ، ایرڈ تے کامسٹ یونیورسٹیاں وچ ڈنگر ڈاکٹرگلی محلے دے کتیاں اتے انٹیسٹا ئین سسٹم دی جانکاری لئی کتیاں نال خون دی ھولی کھیڈ رھے نیں اوھناں سرکار اگے منگ کیتی اے کہ اجیئی ویٹنیریری یونیورسٹیاں دے ڈنگر ڈاکٹراں دی ایس غیر اخلاقی غیر انسانی ریسرچاں اتے پابندی لائی جائے
272
