ادیس ابابا (میڈیا رپورٹ) افریقی ملک ایتھوپیا وچ مارشل لاء لان دی کوشش ناکام بنا دِتی گئی، ہنگامیاں وچ فوج دے سربراہ نوں اوہناں دے حامیاں گولی مار چھڈی پَر اوہناں دی موت دا پَک نئیں ہو سکیا۔ وزیراعظم ابی احمد نے سرکاری ٹی وی تے خطاب کر دیاں آکھیا کہ امہارا نامی علاقے وچ بدامنی پھیلاون تے مارشل لاء لاؤن دی کوشش ناکام بناون چ کُجھ سرکاری اہلکار وی زخمی ہوئے نیں۔ عالمی میڈیا موجب امہارا دے مرکزی شہر باہیردر وچ انٹرنیٹ سروس بند اے۔ امریکی اسٹیٹ ڈپارٹمنٹ نے وی ایس گل دا پَک کیتا اے کہ ایتھوپیا دے تخت شہر ادیس ابابا چ گولیاں چلن دی آواز سُنی گئی اے۔ ایتھوپیا دے وزیراعظم موجب فوج دے سربراہ جنرل سیار میکونین نوں اوہناں دے ساتھیاں گولی مار چھڈی اے۔ ابی احمد دا ایہہ وی آکھنا سی کہ کُجھ سرکاری عہدیداراں نوں اوس ویلے گولی ماری گئی جدوں او امہارا وچ اِک ملاقات لئی اکٹھے ہوئے سن۔ ایتھوپین صدر دے ترجمان دَسیا اے کہ ایس توں پہلاں امہارا دی مقامی سرکار نوں معزول کرن دا جتن کیتا گیا تے ایس جرم چ شامل ملزماں دی کھوج جاری اے۔
426
