ایرانی میڈیا دعویٰ کیتا اے کہ عراق وچ امریکا دے 2 فوجی اڈیاں اتے حملہ پاسداران انقلاب ولوں کیتا گیا اے، جیہدے وچ زمین توں زمین تیک مار کرن والے درجناں میزائل داغے گئے، حملے وچ عراقی فوجی اڈیاں عین الاسد،اربیل تے تاجی کیمپ نوں نشانہ بنایا گیا۔
ایرانی میڈیا مطابق حملے دا نشانہ اوہ تھاوان نیں جتھے امریکی تے اتحادی ملکاں دے فوجی تعینات نیں۔
ایران دے مقامی میڈیا مطابق یوکرین انٹرنیشنل ایئرلائنز دا اک سواریاں والا بوئنگ طیارہ تہران ایئرپورٹ توں اڈن مگروں حادثے دا شکار ہوگیا اے۔ جہاز وچ 180 سوار سن، ہالے تائیں زخمیاں تےمرن والیاں بارے اطلاع نئیں۔ ایس طیارے نے یوکرین دی راجدھانی کیئو اپڑنا سی۔
ایرانی میزائل حملے نوں ویکھ دیاں امریکہ دی فیڈرل ایوی ایشن انتظامیہ نے امریکی شہری فضائی کمپنیاں نوں ایران، عراق، خلیج فارس تے خلیج عمان دے پانیاں اتے فضائی حد ورتن اتے ہٹک لادتی اے۔
ایہہ حملے ایرانی جنرل قاسم سلیمانی نوں راتیں دفناون دے کجھ گھنٹیاں مگروں مقامی ویلے مطابق رات ڈیڑھ وجے کیتے گئے نیں۔
ایران نے عراق وچ واقع اڈیاں ول درجن توں ودھ بیلسٹک میزائل مارے، مقامی ٹی وے المیادین دا کہنا اے کہ پہلا حملہ عراق وچ امریکی فضائی اڈے الاسد اتے کیتا گیا، جتھے کوئی چھے راکٹ سٹے گئے۔
ایس دے فوری مگروں دوجا حملہ اربل دے امریکی فضائی اڈے اتے کیتا گیا۔
امریکی صدر ڈونلڈ ٹرمپ نے ایران ولوں کیتے گئے حملے اتے ردعمل دیندے آں ٹویٹ کیتا: ’سبھ کجھ ٹھیک اے۔ عراق وچ دو فوجی اڈیاں اتے ایران توں میزائل سٹے گئے۔ ہلاکتاں تے نقصان دا اندازہ لایا جا رہیا اے۔ ہن تیک سبھ کجھ بہتر اے۔ ساڈے کول دنیا دی سبھ توں طاقتور تے ہتھیاراں نال لدی فوج اے۔ ‘
امریکی دفاع دے محکمے پینٹا گون نے وی عراق وچ امریکی فوج دے اڈے اتے حملے دی تصدیق کردتی تے آکھیا کہ حملہ مقامی ویلے مطابق سویرے ساڑھے 5 وجے ایران توں کیتا گیا جیہدے وچ ایران نے عراق وچ 2 فوجی اڈیاں اتے اک درجن توں ودھ میزائل فائر کیتے عین الاسد تے اربیل وچ عراقی فوجی اڈیاں نوں نشانہ بنایا گیا۔
ایرانی وزیر خارجہ جواد ظریف نے ٹویٹ کردیاں آکھیا کہ ’ایران نے اقوام متحدہ دے چارٹر 51 تحت اپنے دفاع وچ مناسب پیر پٹدیاں ایس فضائی اڈے نوں نشانہ بنایا اے جتھوں ساڈے شہریاں تے اعلیٰ حکام خلاف بزدلانہ مسلح حملے کیتے جاندے سن۔ اسیں کسے نال کچھ یا جنگ نئیں چاہندے، لیکن کسے وی حملے خلاف اپنا دفاع کراں گے۔‘
316
