افغانستان وچ چین دی مدد نال خام تیل کَڈھن دا کم شُروع

(اسلام آباد سجن ڈیسک ) طالبان نے اِک چینی کمپنی دی مدد نال شمالی افغانستان وچ خام تیل کَڈّھن دا کَم چُھو دِتّا اے ۔ طالبان دے قُدرتی وسیلیاں دے وزیر دا آ کہنا اے کہ سر پل وچ تیل دے کُہوواں( کنوؤں) تُوں دیہاڑی دا 100 ٹن تیل کَڈّھیا جاسی اِس تیل دی وجا تُوں طالبان سرکار نُوں کروڑاں ڈالردی کھٹّی وٹّی ھووے گی ۔
طالبان دی سرکاری تیل، گیس کمپنی تے چینی کنٹریکٹر افچین سانجھے طور اس علاقے وچ خام تیل کَڈہ رھے نیں ۔
قدرتی وسیلیاں دے وزیر شہاب الدین دلاور نے منصوبے دا فیتہ کٹّن والی اِک چینی کمپنی دے زُمے داراں نال سرکاری ٹیلی ویژن نُوں دَس پائی کہ صوبہ سر پل وِچ قشقری دے کُہوہ (کنویں) 21 تُوں تیل کَڈھن دا کم چھیتی ای دیہاڑی دا 100 ٹن تائیں اپڑ جاسی ۔
اوھناں گل بات دا ٹَورا ٹَور دیاں آکھیا کہ 2023 دے آخیر تائیں علاقے وچ ھَور 15 کُنویاں دی کھدائی کیتی جائے گی ، جس پاروں 1000 ٹن تُوں وَدہ خام تیل دی دیہاڑی لَگّن دی اُمید اے تے سرمایہ کاراں نُوں اس منصوبے وچ رلن دا سدًا دتا گیا اے ۔