اورماڑہ دے علاقے وچ بس مسافراں نوں قتل کرن والا گروہ ایران توں آیا

اسلام آباد (سجن رپورٹ) پاکستان دے وزیر خارجہ شاہ محمود قریشی نے اج انکشاف کیتا اے کہ 18 اپریل نوں بلوچستان دی کوسٹل ہائی وے تے اورماڑہ دے علاقے وچ بساں تو لاہ کے 14 سکیورٹی اہلکاراں نوں قتل کرنے والا گروہ ایران توں آیا سی تے واردات کر کے ایران نس گیا۔ ایس گروہ دا تعلق بلوچ تنظیم BRA نال اے تے ایہدا تربیتی کیمپ ایران وچ اے جیہدے خلاف کارروائی لئی پاکستان نے ایران نوں چٹھی وی لکھی اے تے شاہ محمود نے آپ ایران دے وزیر خارجہ جواد ظریف نال گل وی کیتی اے۔
اج اسلام آباد وچ اپنی غیر متوقع نیوز کانفرنس وچ شاہ محمود قریشی نے ایہہ وی دسیا بئی پاکستان ایران دے نال 950 کلومیٹر لمے انٹرنیشنل بارڈر تے خاردار تار والی کندھ دی تعمیر شروع کر چکیا ہے، پیسہ نہ ہوون دے باوجود پاکستان ایہہ دیوار ضرور بناوے گا۔ شاہ محمود قریشی دی نیوز کانفرنس توں پہلاں ایہہ پاکستانی میڈیا وچ آ چکی سی کہ پاکستان نے اورماڑہ حملے وچ ملوث بلوچ باغیاں دے گروہ دے ایران وچ موجود ٹھکانیاں دی نشاندہی کر کے ایرانی حکومت توں ایہناں دے خلاف کارروائی کرن دا مطالبہ کیتا اے۔ شاہ محمود نے پاکستانی نیوز چینلز توں لائیو نشر کوون والی نیوز کانفرنس وچ ایران دی حکومت نوں چیتے کروایا بئی جدوں ایران دی سرحدی سکیورٹی فورس دے باراں اہلکاراں نوں اغوا کر کے پاکستان لیاندا گیا سی تے ایران دی درخواست اتے پاکستان نے کارروائی کر کے 9 اہلکاراں نوں اغوا کاراں توں چھڈا لیا سی ۔ ایس لئی ایران نوں وی اپنے علاقے وچ بلوچ باغی گروپ بی آر اے (بلوچستان ریپبلکن گارڈز) دے اوس تربیتی کیمپ دے خلاف کارروائی ضرور کرنا چاہیدی اے جیہدی نشاندہی پاکستان نے کیتی اے۔ شاہ محمود دسیا بئی ایران دے وزیر خارجہ جواد ظریف نے اوہناں نوں یقین دوایا اے بئی ایران پاکستان ولوں دتی گئی معلومات تے کارروائی ضرور کرے گا۔ شاہ محمود دسیا کہ پاکستان ایران نال اپنی سرحد دی نگرانی بہتر بناون تے دہشتگردی دے واقعے روکن لئی پاکستان نے نویں حکمت عملی بنائی اے جیہدے تحت نویں جنوبی کمانڈ بنائی گئی اے جیہدا مرکز تربت وچ اے۔ ایہدے نال پاکستان نے معاشی اوکڑاں دے باوجود ایران بارڈر تے خاردار تار والی دیوار بنانا شروع کر دتی اے۔ تے ایران بارڈر تے نگرانی لئی نویں ہیلی کاپٹر سروس وی شروع کر دتی اے تے نالے بارڈر دی نگرانی لئی ایف سی دی نویں نفری وی بھرتی کیتی گئی اے۔ شاہ محمود دسیا بئی پاکستان دے وزیراعظم عمران خان دے تہران دورے وچ بلوچ گروہاں دے خلاف کارروائی تے بارڈر سکیورٹی دے معاملیاں تے وی گل ہووے گی۔