کچی جماعت تے پکی جماعت

لکھاری
وقاص ضیا
کہن نوں پنجاب پورے دیس دا ٹکر اگاون دی تھاں ہے پر اصل وچ حقیقت ایس توں بہوں دور ہے۔ بھکھ ساڈے دیس دا راہ کدوں تکیا تے کدوں تک ایہہ ایتھے ڈیرے پائی رکھے گی۔ اینہاں دونہاں سولاں دا جواب لبھنا ڈھیر اوکھا اے۔ ساڈی سوچ دے وچ دو وقت دی روٹی دا سفنہ ساڈے لاشعور اچ انج رلیا کہ ہن ایہنوں کڈھنا ساڈے آپنے وس دی گل نئیں رئی۔ فکر دے گھوڑے دوڑا کے دیکھو تے بھکھ ساڈی روز دیہاڑ دی بولی اچ ساہنواں ارگوں رل مل گئی اے۔
بالاں نوں سکول بھیجن دا ویلا آوے تے پہلی گل جیہڑی دماغ وچ آؤندی اے اوہ ایہ اے کہ بھائی ہن بچے نوں کچی جماعت اچ بھانا اے یا پکی جماعت اچ۔ گل ایتھے ای روک دیو۔ ایہہ کچی جماعت تے پکی جماعت اصل اچ ہے کیہہ اے۔ ایس گل تے تھوڑا غور کرو۔ میں آپنے ولوں کچھ پرکھ کیتی تے جیہڑی گل میرے سامنے آئی اوہ ہوش گنوا دین آلی سی۔ کچی تے پکی جماعت۔۔۔اج دی زبان اچ ایہناں نوں کنڈر گارٹن تے گریڈ ون یا پہلی جماعت آکھیا جاندا اے۔۔۔ ایہہ دو قاعدے سن۔ کچی جماعت یعنی کنڈر گارٹن وچ پڑھائے جان آلے قاعدے دا ناں کچی روٹی سی۔ تے پہلی جماعت وچ پڑھائے جان آلے قاعدے دا ناں پکی روٹی سی۔ بالاں نوں تعلیم دا شوق دیوان لئی قاعدے دا ناں کچی روٹی تے پکی روٹی رکھن پچھے کیہہ سچائی اے۔ جی۔۔اے بھکھ سی جیہڑی دماغاں اچ چھائی ہوئی سی۔ گل ایتھے نئیں مکدی۔ ساڈی روز دیہاڑ دی بولی وچ استعمال ہوون آلے محاورے غور نال ویکھو۔ اننھا ونڈے ریوڑیاں ۔۔۔چوپڑیاں تے دو دو۔۔۔ہاتھی دے دند کھاون دے ہور وکھاون دے ہور۔ ۔۔پلے نئیں دھیلا تے کردی میلا میلا۔۔۔تیرے منہ وچ گھیو شکر۔۔۔ادھ میاں منورا تے ادھ باقی ٹبرا۔۔۔تے ہور بھؤں سارے محاورے ایس حقیقت دے گواہ ہن کہ جیہڑی بھکھ اساں ویکھی اوہ ساڈے ذہناں وچوں نکل ہی نہئیں سکی۔ ایس وچ قصور کس دا سی۔ کیوں لوکی ایس کنک اگان آلی دھرتی تے حملہ آور ہوئے تے کیوں ایتھے دے وسنیک بھکھ دا شکار ہوئے۔ ایہہ گلاں فیر کسے ویلے تے رکھئیے تے ہن ایس تے گل مکائیے کہ جدوں تک اسی آپ کوشش کر کے ایس بھکھ نوں آپنے ذہنوں نئیں کڈھاں گے ساڈے حالات نئیں بدل سکدے۔