لکھاری
ڈاکٹر داؤد مجوکا
کجھ کملیاں لوکاں ایہہ گل بنائی اے بئی اوہ سیاستدان جنہاں ایس ملک وچ ٹُٹی بھجی چار دن حکومت کیتی اوہناں ایتھے اجئہیاں بیماریاں دے علاج لئی ہسپتال کیوں نہ بنائے جنہاں دے علاج لئی اوہناں نوں باہر لے ملکاں وچ جانا پیندا اے ؟
اوہناں دا خیال اے بئی ہسپتال اُسارنا نری اک عمارت کھڑی کرنا اے اعلٰی طبی سہولتاں والے ہسپتال واسطے پورا انفرااسٹرکچر چاہئیدا ہوندا اے۔
۔ میں آپ جرمنی دے اک دل دے مرضاں دے مشہور ڈیپارٹمنٹ وچ 15 ورھے کم کردا رہیا واں۔
اج کل علاج اینا باریک تے خاص ہو چُکیا اے بئی وکھو وکھ قسم دی ٹیکنالوجی دے ماہر آں دی لوڑ ہوندی اے تے نال نال مشینوں دی وہ لوڑ ہوندی اے۔
اوس دی اک مثال میں ایہہ دینا چاہنا واں بئی ایم آر آئی دی اوہ والی مشین پاکستان وچ ہے ای نہیں سگوں اوس نوں چلا ون دا وی کوئی ماہر نئیں ہے۔
دل دی صورتحال تے خون دی سپلائی ویکھن لئی جو پی ای ٹی مشین ورتی جاندی اے، اوس لئی ڈیپارٹمنٹ دا اپنا Cyclotron سی جتھے تابکار مواد پیدا کیتا جاندا سی۔ فزکس دے ماہر اوس نوں چلاندے سن تے پھیر ریڈیو کیمسٹری دے ماہر اوس نال اوہ مارکر بناندے سن جیہڑے دل دی صورتحال دسدے نیں۔
جیہڑی تصویراں بن دیاں نیں اوہناں اُتے کم کر کے میں پی ایچ ڈی کیتی ۔
ایس توں گویڑ لائی جا سکدی اے بئی کِنی کُو پڑچول ماہر لوک تے سیانے چاہیدے ہوندے نیں۔ ایس ڈیپارٹمنٹ توں ہر سال کئیں پی ایچ ڈی نکلدے نیں جنہاں دا کم کیمسٹری، کارڈیالوجی، فزکس، بائیولوجی، کمپیوٹر سائنس تے حساب دے شعبیاں وچ ہوندا اے۔
آپریشن تے سٹنٹ دی ٹیکنالوجی تے باریک سرجری وغیرہ ایس توں وکھ نیں ۔ ایس توں اڈ اوہ ورکشاپاں نیں جنہاں وچ آپریشن دے واسطے لوڑیندا
اوہ سامان بنایا جاندا اے جنہاں نال ایسے باریک آپریشن ہوندے نیں
ایہناں باریک آپریشناں وچ ست ماہے تے نویں جمن والے نیانیاں دی آپریشن شامل نیں۔
ایہہ سارا انفرااسٹرکچر تے ماہر نہ پیسے نال بن سکدے نیں تے نہ دس سال دی حکومت نال بن دے نیں۔ جے کدی انج ہو سکدا ہوندا تے دبئی یاں قطر والے وی کدوں دے بنا چُکے ہوندے۔
ایہہ ہی گل ہر شے بارے آکھی جا سکدی اے بئی اینے ورھیاں وچ فلانے نے دل، دماغ، جگر تے دوجیاں مرضاں دے چوٹی دے ہسپتال کیوں نہیں بنائے۔
شوکت خانم، جس دا ذکر کر دے تحریک انصاف والے تھک دے نہیں، دنیا وچ شاید چوٹی دے 500 ہسپتالاں وچ شامل نہیں اے۔ ایہہ ہسپتال پچھلے اینے ورھیاں وچ چوٹی دا ہسپتال کیوں نہ بن سکیا؟
