پل شاہ دولہ گوجرانوالہ
شاہجہان نے ایہ پل نالا ڈیک ا تے بنوایا سی اس وقت جی ٹی روڈ موجودہ لوکیشن چ نہیں سی جرنیلی سڑک انگریج نے 1902 دے لاگے بنوائی پہلاں اے سڑک لہوروں نکل کے نالہ ڈیک کراس کردی ہوئی ایمن باد فر گوجرانوالہ چ داخل ہندی سی ۔سون بھادوں چ بارشاں دے نتیجے چ ڈیک دا پانی دو توں تن میل تائیں پھیل جاندا سی ،آوا جاوی رک جاندی سی مال ڈھون چ بھوں اوکھتاں پیش آندیاں سن ،کہیا جاندا اے کہ شاہجہاں دی کڑی ایناں دناں چ لہور جارہی سی کہ ڈیک دا سیلابی پانی راہ مل بیٹھا بڑی سوچ وچار توں بعد قافلہ پانی چ اتاردتا گیا جس دے نتیجے کافی سارا نقصان ہوگیا ،لہور اپڑ کے شاہجہان دی کڑی نے لہور دے گورنر نوں آکھیا چھیتی توں چھیتی نالہ ڈیک اتے پل دی اساری کیتی جاوے،حکم مندیاں سارے ماہراں ( تعمیرات) نال رابطہ کیتا گیا پئی پانی نوں کنٹرول کردے ہوئے جنی کو جگہ چوں پل بنا کے پانی گزاریا جاندا سی پانی اپنے زور نال پل نوں روڑہ کے لے جاندا سی۔
لہذا گجرات دے اک ماہر تعمیرات (انجینئر) سید کبیرالدین شاہ دولہ دریائی دی خدمات دا فیصلہ کیتا گیا ،شاہ جہان دی کڑی 12 ہزار روپے شاہ دولا نوں بیجوائے کہ پل دی تعمیر کیتی جائے،شاہ دولا گورنر نوں پیسے واپس کردتے نالے آکھیا کہ دھی رانی نوں کہنا کہ اسیں پنجابی دھیاں کولوں پیسے نہیں لیندے ،دینے آں ،اپنے پلیوں پل دی تعمیر شروع کردتی پل ڈبل سٹوری بنایا گیا تھوڑا پانی پہلی منزل تھلیوں لنگدا سی اتوں دی آمدورفت ہندی سی ،زیادہ پانی دی صورت چ دوسری منزل چوں پانی لنگنا شروع ہوجاندا سی تے ہیٹلی آمدورفت رک جاندی سی اوپر والے حصے توں شروع ہوجاندی سی۔اس دی تعمیر تے چارہزار روپے خرچہ آیا ،جیہڑا شاہ دولا اپنے جیب چوں لایا تے اس پل دا ناں “شاہ دولہ پل ” رکھ دتا گیا۔۔ صدیاں گزرن توں بعد ہیٹلہ حصہ ٹٹ کے پانی دی نذر ہوگیا اوپر والا حصہ قائم رہیا اپنی خستہ حالی دے باوجود کئی پنڈاں لئی لنک دا کم دیندا رہیا،چھ ست سو سال توں بعد پل دا باقی ماندہ حصہ جو گزرگاہ دے طور تے استمال ہندہ سی عام ٹریفک لئی بند کردتا گیا اے چند دن پہلاں پل چ تریڑ آگئی اس خطرناکی دی پیش نظر بند کردتا گیا۔۔۔۔۔
تریخ پنجاب چ کنہیا لال کپور تے سید عبدالطیف نے پنجاب دی تریخ لکھدے ہوئے اس پل دا تذکرہ کیتا اے ۔۔۔
اپنے متر پیارے چوہدری محمدانور کمبوہ ایڈووکیٹ دی دتی ہوئی ترغیب دی وجہ توں عامر اوجلہ دی سنگت چ پل دی یاترہ کیتی۔۔۔
(خلیل اوجلہ)
32
331
