لکھاری۔
بابا داؤد
بہوں سارے سنگی ایہہ پچھدے نیں جو لوک پاکستان بنن دی روایتی تعبیر نوں نہیں منندے اوہناں کول کوئی ہور گل اے یاں اوہ نرا پاکستان بنن نوں ای غلط سمجھدے نیں
ایس دا سادہ سا جواب ایہہ اے پاکستان وچ بہوں سارے گروہ نیں۔ مذہبی تعبیر والے وی سارے لوک پاکستان بنن دے حامی نہیں سن۔ پر پاکستان بنن مگروں اوہناں مذہبی بنیاداں اتے پاکستان دا نظریہ بنا لیا تے ایس نظریے دے مامے بن گئے۔
ہن فیر ایہو سوال سامنے آؤندا اے جو پاکستان بنن بارے دوجی گل کیہ اے،
ایس بارے سادی جہی گل اے جو پاکستان بنن دی لہر اک گروہ دے آپ ہدرے پن خلاف جتن سی۔ تاں جو ملک وچ رہن والے دوجے گروہاں دیاں شناختاں دی راکھی کیتی جاوے۔ اوہناں دے مذہباں تے بولیاں نوں تحفظ دیتا جاوے۔ اوہنان نوں آئینی تحفظ دتاجاوے۔ اک وڈے گروہ دا آپ ہدرے رویاں اتے زور دتا جا رہیا سی۔ اوہناں دا آکھنا سی کہ اوہناں دی آئینی تے سیاسی تشریح نون من لیا جاوے۔ ایس اصرار پاروں دوجے گروہ نوں انج لگیا جو اک اکٹھے ملک وچ اوس دیاں شناختاں دی راکھی اوکھی ہووے گی۔ اوس گروہ بتہیرے جتن کیتے جو اکو ملک وچ رہندیاں اوس دیاں شناختاں نوں آئینی حقاں وانگوں من لیا جاوے۔ سارے جتن دے باوجود متحدہ ملک وچ اپنی مذہبی تے لسانی شناختاں لئی راستیاں نوں بند پایا تے اوہناں لئی وکھرے ملک دے علاوہ کوئی راستہ نہیں رہیا سی، قرارداد پاکستان وچ وکھو وکھ ریاستاں دا ذکر سی ایہہ اک وفاقی نظام دا مہبم ذکر سی جیس وچ ساریاں وفاقی اکائیاں دی شناختاں تے بولیاں دی راکھی کیتی جاوندا۔
پر آزادی مگروں جتھے ہندی بولی دے آپ ہدرے پن دی تھاں اردو دے آپ ہدرے پن لے لی تے اوہدے راہیں اک نویں گروہ اپنی زور زبردستی قائم کرن دا جتن کیتا۔ ہن ایدے خلاف پہلا جتن بنگلالی لوکاں ولوں سامنے آیا۔ بدقسمتی نال اوہدا نتیجہ ملک دی اک ہور ونڈ وچ نکلیا، سنتالیس وچ وی زور زبردستی کرن والا گروہ ملک وچ امتیازی سلوک نوں مکاون لئی ، آئینی تحفظ دین تے دوجی بولی نوں منن لئی تیار نہیں سی،، کایبنٹ کمیشن دیاں تجویزاں مطابق صوبائی اختیاراں دی ونڈ اتے تیار نہیں سی۔ یہی گل اکتہر وچ ہووی، زور زبردستی کرن والا گروہ سیاسی تے جمہوری طریقیاں نال کسے سمجھوتے اتے نہیں پہنچن لئی تیار نہیں ہوویا تے ملک دوجی واری ونڈیا گیا۔
اجوکے پاکستان وچ پاکستان دی تاریخی شناخت زورزبردستی کرن والے گروہ خلاف اوس دے تاریخی جتن دی روشنی وچ وی دیکھی جا سکدی اے۔ پر اوہدے نال سانوں ایہہ گل وی چیتے رکھنی چاہیدی اے جو سرزمین پاکستان وادی سندھ دے حوالے نال وی اک شاندار پچھوکڑ رکھدا اے۔
پاکستان دے سارے لوکاں دیاں بولیاں نوں تے شناختاں نوں اجے وی پوری طرح منیا نہیں گیا، ایہہ جتن اجے جاری اے۔ اوس لئی سانوں پاکستان ڈیہار اتے ایہہ فیر متھنا ہووےگا جو پاکستان دا اصل مقصد ایہہ سی جو کسے خاص گروہ تے خاص بولی دے آپ ہدرے پن تے زور زبردستی نوں نہیں ،منیا جاوے گا۔
سارے گروہاں دیاں زباناں تے شناختاں نوں آئینی تحفظ دیتا جاوے گا
سارے مذہباں نوں عزت تے تحفظ دیتا جاوے گا سارے لوکاں نوں اوہناں دے عقیدے مطابق عبادت کرن دی اجازت دتی جاوے گی۔
