ٹوٹے

لکھاری
ثنا اللہ گوندل

مخول دی اک پرانی گل اے۔ اک واری بڑی کرنی والے پیر ہوندے سے۔ پیر ہوراں دی زنانی اوہناں نوں نکرما سمجھدی ہوندی سی۔ اک دیہاڑے پیر ہوراں اپنی کرامت نال اسمانی اڈنا شروع کر دتا۔ جدوں پیر ہوری گھر مڑے تے اوہناں دی گھر والی اکھن لگی بئی اصل کرنی والا پیر تے اوہ اے جیہڑا اج اسمانی اڈ دا پھر رہیا سی۔
پیر ہوری بڑے چاء نال دسیا بئی اوہ میں ساں جیہڑا اسمانی اڈ رہیا سی۔ پیر ہوراں دی گھر والی جھٹ بولی: اچھا میں وی آکھاں بئی ایہہ ٹٹ پینا ڈنگا ڈنگا کیوں اڈ رہیا اے۔
میں ایس نتیجے تے اپڑیا واں بئی نظریاتی لوکاں نال بحث کرکے لہو ساڑن نالوں بندہ فلٹر والا اک سگریٹ پی لووے۔ تسی آکھو گے بئی سگریٹ پین نال دے صحت خراب ہوندی اے۔ میں اکھنا بئی نظریاتی لوکاں نال بحث کرنا تے سگریٹ پینا دویں صحت لئی نقصان دیون والیاں شیواں نیں، پر سگریٹ دا پھیر کوئی چس اے، بحث نری مغز کھپائی اے۔
میں کئیں ورھے لوکاں نال سر کھپائی کر دا رہیاں بئی ملالہ نال ویر رکھن دی کوئی وجہ تے دسو۔ کوئی مولوی یاں سرخا اج تائیں اک وی وجہ نہیں دس سکیا۔
اردو دے مخولیہ لکھن والے مشتاق یوسفی ہوری لکھیا اے بئی بشارت دا سوہرا کسے نال اتفاق نہیں سی کر داے۔ جے کسے آکھنا بئی اے گرمی بڑی اے تے اوس اگوں ولدا دینا، اخے نہیں گرمی تے کل پینی اے۔
نظریاتی لوکاں نوں جے اوہناں دے استاد ایہہ گل دس دیون ناں بئی کے ٹو دا پہاڑ اصل وچ یہودیاں یاں سرمایہ داراں نے ایتھے لیا کے گڈیا سی تاں جو کدی ایتھے اسلامی ریاست پاکستان دے ناں نال بنے گی تے اوس دا گوانڈھی چین ہونا اے تے ایس پہاڑ دی ٹیسی تے بہہ کے اسی ایہناں ملکاں دی سوہ رکھنی اے۔ تسی لکھ ٹکراں مار لیندے بئی ایہہ رب ولوں اوس ویلے بنے سن جدوں یہودی یاں سرمایہ دار اجے جمے وی نہیں سن، اوہناں تہاڈی گل نہیں سی مننی۔