لہور اتے چھیواں حملہ
لہور وچ اک ہور صدمہ سلطنت فیروز شاہ باربک تغلق دے دور وچ آیا۔ ایہہ صدمہ وی تاتاری مغلیہ لشکر دے حملے پاروں پیش آیا، ایس حملے دا مقصد وی پنجاب وچ لٹ مار کرنا ای سی، بادشاہ اوس ویلے سری نگر کانگڑے نوں گھیرن وچ مصروف سی، پہلاں اوس قلعہ فتح کیتا فیر پنجاب وچ آیا، اوس اک خونی جنگ مگروں تاتاری لشکر نوں پنجاب وچوں کڈھیا، ایس ساری لڑائی وچ لہور دی رعایا دا اک وار فیر ڈھیر نقصان ہویا۔
لہور اتے ستواں حملہ
سلطان محمد شاہ بن فیروز شاہ باربک دے عہد وچ گھکڑ قوم دا بندہ سیکھا دے کارن لہور وچ وڈا حملہ ہویا، سیکھا گھکڑ بڑا فسادی تے دلیر سی، اوہ ہزارہ دے علاقے توں اک فوج لے کے پنجاب وچ داخل ہویا۔ ایتھے دے شاہی اہلکاراں نوں علاقے توں کڈھ دتا۔ اوس ہزاراں بستیاں اجاڑ چھڈیاں۔ محمد شاہ بادشاہ نے ایہہ کارروائیاں دا سنن مگروں اپنے پتر ہمایوں نوں فوج دے کے پنجاب وچ گھلیا، ہالے شہزادہ پنجاب وچ اپڑیا وی نئیں سی پچھوں بادشاہ مرگیا۔ سلطان محمود شاہ 796 وچ تخت سانبھیا، اوس نے ہور فوج سیکھا گھکڑ نوں کچلن لئی گھلی۔ اوہناں دی آپس وچ ڈاھڈی لڑائی ہوئی۔ سیکھا شکست کھاون مگروں جموں ول نس گیا۔ اوہناں دناں شہزادہ پیرمحمد بن امیر تیمور نے ملتان لے لیا اوہ ملتان توں دلی اپڑگیا۔ ایس دوران سیکھا گھکڑ فیر جموں توں تھلے لہور اپڑگیا تے ایتھے سرکار سانبھ لئی، جدوں امیر تیمور دلی توں پرتیا تے جموں دے سلطان سکندر بت توڑن والے بادشاہ دا لباس بطور عنایت دیتا، ایس دوران رعایا نے سیکھا دے پنجاب وچ قتلام بارے امیر نوں عرض گزاری، ایہہ حال سن اوس نوں ڈاھڈا غصہ آیا، دس ہزار فوج سیکھا دے مقابلے لئی فوری گھل دتی، فوج لہور اپڑی ایتھے دی رعایا سیکھا شاہی توں بوہت تنگ سی، اوہناں امیر تیمور دی فوج دا ساتھ دتا، لڑائی وچ سیکھا ماریا گیا۔
687
