سوہنے پنجاب دیاں سوہنیاں پہاڑیاں

لکھاری
فہد احمد مسن

سوہنا پنجاب تے ایس دے پہاڑ وی سوہنے، پہاڑاں نال عشق کرن والے وسدے پنجاب دے واسی وی سوہنے۔ پہاڑاں دی کھچ رکھن والے جدوں ایہناں پہاڑاں اتے چڑھدے نیں پنجاب رنگاں دیاں جلترنگ وجنا شروع ہو جاندی اے۔ پہاڑاں تے ایہہ سماں پنجاب دے سوہنے ڈھولے ماہیے تے گاون دی واج مست کر دیندی اے۔
پہاڑاں دے چپ وی پنجابی تے اوہناں تے ہوک وی پنجابی، پہاڑاں دی تال تے اتے چڑھن والیاں دیاں دلاں دی دھڑکناں وی پنجابی۔
پنجاب دی سرحداں اتے کھلوتیاں مارگلیاں دیاں پہاڑیاں پنجاب دی شان، آن، عظمت، حشمت جاہ و جلال دے نال نال پنجابیاں دے اچے شملے وانگ فخر نال کھلوتیاں نیں۔

سیاسی ونڈ پاروں ایس علاقے نوں تخت شہر اسلام آباد دا حصہ آکھیا جاندا اے پر اصل وچ ایہہ پنجاب اے۔
مارگلہ دیاں پہاڑیاں دنیا دی چھت ہمالیہ پہاڑ دا ای حصہ نیں سگوں ایہہ پہاڑی سلسلہ راولپنڈی توں ای شروع ہوندا اے تے اگے جا کے ایہہ مری دیاں پہاڑیاں نال رل جاندا اے۔ پنجاب دے متھے دا جھومر ایہہ پہاڑیاں پورب ول پنجاب دی ولگن وی نیں۔
تحت شہر اسلام آباد وچ ایہہ من موہنیاں پہاڑیاں 12605 ہیکٹر پھیلیاں نیں۔ ہری گچ ایہناں پہاڑیاں دیاں درشناں لئی نہ صرف پنڈی اسلام آباد سگوں پورے پنجاب تے پورے ملک توں لوک کھچے آوندے نیں تے لوک ایہناں پہاڑیاں نال اپنے کجھ راز سانجھے کردے نیں۔
پنجاب دی شان ایہناں پہاڑیاں دا جادو پاکستانیاں نوں تے اپنے کلاوے وچ لئی کھلوتا اے نال نال سو توں ودھ ملکاں دے اسلام آباد وچ لگے سفیراں تے دوسرے دیساں توں آئے پروہینیاں لئی وی ایہہ بڑی کھچ رکھدیاں نیں۔
آکھدے نیں بئی کدی پرانے وقتاں وچ ایتھے راول تے جگنی نے بہہ کے عشق کیتا سی ایس عشق دی مٹھاس اج وی ایہناں پہاڑاں دیاں وادیاں وچ کناں وچ رس تے دلاں وچ سکوں اتار دیندا اے۔
ایہناں پہاڑیاں وچ کئیں لانگھے بنے نیں۔ انج لگدا اے بئی ایہناں پہاڑیاں نیں لوکاں نوں اپنے دل وچ لاہون لئی پر فریب جال وچھائے نیں۔ ایہہ راہواں لوکاں نوں اگے توں اے ای کھچ دیاں رہندیاں نیں۔ ایہہ راہوں دلاں دیاں دھڑکناں تیز کر کے پہلوں تے لوکاں نوں دنیا دی فکراں تے آزاد کراندیاں نیں تے پھیر ہولی ہولی نویں احساس پیدا کر کے نویں دنیا وچ لے جاندیاں نیں۔ لوک انج جا رہئے ہوندے نیں بئی جیویں اگے کوئی سوہنی پری اوس دی اڈیک وچ بیٹھی اے جس نال مرد اپنے عشق تے زنانیاں اپنے دل دے راز پھولن گیاں۔

جیوں شاعر نے آکھیا اے۔
پربھت دھاراں روہ گھنیڑے ۔جتھ لانگھے جتھ تھیوم وہیرے
ایہہ پہاڑیاں ماڑے توں ماڑے بندے نوں اپنے سینے اتے انج بٹھا کے لوریاں دیندیاں نیں جیوں ماواں اپنے بچیاں نوں ہانہہ تے بٹھا دے سکھ مان دیاں نیں۔
اج کل لوکاں موٹرکاراں تے بہہ بہہ کے اپنے جثے اینے موٹے کر لئے نیں بئی بندے ڈھگے تے زنانیاں گاواں لگدیاں نیں۔ جدوں ایہہ لوک ایتھے آؤندے نیں تے ایہہ پہاڑیاں طبیب وانگوں ایہناں دے بلڈ پریشر، ذہنی دبا، شوگردے مرضاں نوں لاہ کے پرانہہ سٹ دیاں نیں تے جسم وچ جمیا لہو رگاں وچ مڑ نسن لگ پیندا اے۔ جدوں لہو پوری طاقت نال دماغ، دل ،پھیپھڑے تے گردیاں وچ جاندا اے تے پھیرنویاں سوچاں تے نویں سریر بندے دے نال ہوندا اے۔ تھلے آون تائیں اک نواں بندہ اپڑ دا اے۔
واپسی تے بندہ آؤندا اے تے دل دے اندر جت جاون دا اک احساس وہ ہوندا اے۔
مارگلہ دیاں پہاڑیاں اتے پیر سوہاوہ، دامن کوہ تے مونال ورگیاں تھاواں بنائیاں گئیاں نیں۔ ایہہ دنیا دی تواریخ وچ سب توں جوان پہاڑیاں نیں جہناں دی عمر پنج ہزار سال اے۔