شکریہ محمدحنیف، بی بی سی
خان صاحب دے دشمن آکھدے نیں اوہ گٹے جوڑکےجھوٹھ بولدے نیں، چلو ایہہ گل من لیندے آں پر ایہہ وی اے پئی خاں صاحب جدوں سچ بولدے نیں تاں رجھ کے بولدے نیں، جس نوں سن کے سیاستدان کناں نوں ہتھ لادیندے نیں۔ اوہناں پچھلے دناں نیویارک ٹائمز نال انٹرویو دتا جہدے وچ آکھیا ساڈی فوج نےعسکری تے جہادی گروپ بنائے سن مجاہد تیار کیتے سن۔اوہدوں سانوں اینہاں دی لوڑ سی، ہن نئیں اے۔ دنیا بھانویں کجھ کہوے ہن ساڈا فیدا ایہو آکھدا اے پئی اینہاں گروپاں نوں ختم کرنا پئے گا۔
ایہو گل نواز شریف آکھی سی اوہ اج کل اپنیاں ضمانتاں کراندا پھر رہیا اے، ایہو گل اک صحافی بھائی نے اخبار وچ کہی سی اوہدا ناں اے سرل المیڈا اوہ وی گھر بیٹھ کے اپنی جان بچاندا پھردا اے۔
چلو خاں صاحب دی گل من لیندے آں، اوہ سچ کہندے نیں۔ موسم بدلدے رہندے نیں۔ بندے وی بدلدے رہندے نیں۔ ملک وی بدل جاندے نیں۔ خان صاحب دی گل توں مینوں اپنا اک مرحوم یار یاد آگیا اوس اک دن کوئی گل کرنی اگلے دیہاڑکجھ ہور، اسیں آکھنا ایہہ کیہ کہنا ایں؟اوس آکھنا کل میں پاگل ساں اج میں ٹھیک ہوگیا آں۔ چلو اسیں من لیندے آں کل اسیں پاگل ساں ہن اسیں ٹھیک ہوگئے آں۔
خان صاحب ایہہ نئیں دسیا ایہہ جہادی گروپ مکانے کیویں نیں۔ ایہہ کوئی ہٹی تے ہے نئیں کہ سارا دن کھولی رکھو تے شامیں جندرا لاکے ٹُر جاو۔ جہادی گروپ بناون لئی اک سوچ بنانی پیندی اے، اوہ سوچ ایس قدر پھیل چکی اے پئی ہن یونیورسٹیاں وچ پڈھیار اپنے استاد مار دیندے نیں،پڈھیاراں دے جتھے اپنے ساتھی نوں ایس لئی ہتھی ماردیندے نیں کیوں جے اوہناں نوں اوس دی کوئی گل مذہب دے خلاف لگدی اے۔ پر ایہہ اوہ لوک نیں جیہڑے ساڈے نال اٹھدے بیندے نیں،ہن جیہڑے بندوقاں چک کے خودکش جیکٹاں دی ٹریننگ لے کے تیار ہوئے سن۔ اوہناں داکیہ کرنا اے؟ اسیں اوہناں نوں دسیا سی پہلے دن اسیں کابل آزاد کرانا اے۔ اوہ کابل ٹر گئے، فیر چلے کشمیر آزاد کران۔ نال ایہہ وی وعدے پئی چیچنیا وی اسیں آزاد کرانا اے۔ فلسطین توں وہیل ملی تاں دلی دے لال قلعے اتے جھنڈا وی ٹھوک آواں گے۔ ہن اوہناں نوں کیہ کہیے کہ اسیں ہنبھ گئے آں۔ ساڈے گھر دانے مک گئے نیں تے جہاد بھل جاو ،تے کوئی چھوٹا موٹا کاروبار شروع کردیو۔ جنہاں نوں سورمے بنا کے پالیا سی، اوہناں ہن آکھیا تسیں دھی بھلے دیاں ریڑھیاں لاو۔ جنہاں نوں جنت دی حوراں دی سراپے یاد کراکرکے وڈا کیتا سی۔ اوہ ہن بنکاں دے باہر سیکیورٹی گارڈ لگ جاون۔ کلی فوج نیں ایہہ جہادی گروپ نئیں سی بنائے۔ اسیں ساریاں اپنا اپناحصہ پایاسی۔ چلوٹھیک اے اسیں پاگل ساں ہن سارے ٹھیک ہوگئے آں۔ پر جنہاں نوں چالیہ ورھیاں توں پاگل بنایااوہناں توں وی پچھ لو کیہ اوہناں نوں آرام آیااے یاں نئیں۔
