بھٹو روز پیدا نئیں ہوندے

فروری 1974 دوجی اسلامی سربراہی کانفرنس لہور تے پنجاب اسمبلی ہال نوں ایس لئی چنیا گیا، ملک دے پہلے چونویں وزیراعظم ذوالفقار علی بھٹو نیں اسلامی
دنیا دے پنجا سربراہاں نوں سدا دتا۔ پروہنیاں دے رہن لئی شہر دی سوہنی کوٹھیاں نوں اوہناں دے رہن لئی چنیا گیا۔ ہر کوٹھی دا مالک ایس گل تے خوش سی پئی اوس دا گھر پروہنا آیا گا۔سعودی عرب دے پادشاہ شاہ فیصل لئی سٹیٹ گیسٹ ہاوس چنیا گیا۔
ہر پروہنے دا سواگت صدر فضل الہیِ چودھری ہوائی اڈے جاکے کیتا۔ موٹرسایکلاں اتے چوکس پلس تے ملٹری والے سارے رستے نال ہوندے۔ مال روڈ اتے بلڈنگاں نوں سجایا گیا سی۔ اوہناں اتے چوکسی وی رکھی گئی سی۔ کسے ایمرجنسی نال نبڑن لئی چوکھا بندوبست کررکھیا سی۔
پنجاب اسمبلی نوں وی نویں فرنیچر تے سجاوٹ دے سامان نال سوہنا بنایا گیا سی۔ اوہدے اندر قیمتی فرنیچر وچھائے گئے جنہاں نوں میکلوڈروڈ دے امیر برادرز نیں خصوصی تیار کیتا سی۔ قالیناں دے سوداگراں اپنے قیمتی قالین اسمبلی ہال، شاہی قلعہ تے شالامار باغ وچ وچھان لئی بڑی عقیدت نال دتے۔
پروہنیاں نماز جمعہ شاہی مسجد پڑھی، رات دی روٹی شاہی قلعے تے اتوار نوں 24 فروری شامیں چاہ شالا مار باغ وچ پین لئی گئے۔

ذوالفقار علی بھٹو دوجے اسلامی لیڈراں سعودی شاہ فیصل، لیبیا دے کرنل معمر قذافی، مصر دے انورسادات، سوڈان دے عیدی امین تے کئی وڈی ہستیاں اوہناں نال سن۔
سبھاں لیڈراں نیں ایس بھرویں سواگت دا ودھ کے جواب دتا۔اوہناں دے چہرے دس رہے سن پئی پاکستان آکے اوہ خوش وی نیں نالے اک نویں طاقت بنن دا آہر وی وکھائی دے رہیا سی۔ اوہ جاندے سن عالمی طاقتاں لئی چیلنج بنن جارہے نیں۔

ذوالفقارعلی بھٹو دی کرشمہ ساز شخصیت لوکاں دی نبض اتے ہتھ رکھن دی صلاحیت، حالات دا تجزیہ کرن تے آن والے ویلے دا مقابلہ کرسکدی سی۔ اسلامی سربراہی کانفرنس اک وڈی کامیابی سی۔ اسلامی دنیا بھٹو دی سوچ تے فکر نوں من لیا سی۔ خاص کر عرب ملکاں دی قیادت بہت زیادہ اعتماد کرن لگی۔
ایس صورتحال نوں امریکہ تے اوہدے دوجے یورپی سنگی جنہاں پہلاں بھٹو نوں قبول کرلیا سی،فیر اسی نویں اتحاد دے بنن توں کجھ ناراض ہوگئے۔
بھٹو ایس نوں چنگی طرحاں جانندے سن اوہناں سدھی سانویں گل کیتی سی، تے اینہاں طاقتاں نوں للکاریا وی سی ایہہ للکار ایویں نئیں ہوندی اوہدوں ای بندہ اجیہی ہمت وکھاندا جدوں اوہدے پچھے بندے کھلوتے ہوں۔
بھٹو اپنی اک تقریر وچ آکھیا سی نویں پاکستان نوں بہوں ساریاں اوکھتاں دا سامنا اے۔ جیہدے وچ کجھ اندرلی تے کجھ باہرلی ہن۔ سانوں اپنے پیراں اتے کھلونا اے تے باہرلی دنیا دے پیرنال پیر ملاکے چلناہووے گا۔
بھٹو اک سچا سیاستدان سی، جنہوں علم سی کس موقعے تے اوس کیہ گل کرنی اے،اوس نوں گل کرن لئی بہتا سوچنا نئیں پیندا سی۔ اوہ اجیہا سیاستدان سی جنہیں اسٹیبلشمنٹ نوں وی بہوں کول توں ویکھیا سی تے دوجے پاسے لوکائی نوں وی ہیٹھلے پدھر تے جاکے اوہناں دے دکھاں نوں محسوس کیتا۔ بھٹو دا عومی انداز دنیا دے کئی لیڈراں وچ سی، پر اوس نوں جنہاں چاہیا گیا تے پسندکیتا گیا، بہت گھٹ دے حصے ایہہ آیا۔ وہ بڑے غیر محسوس انداز نال لہجے وچ جذبات نوں شامل کرکے اپنے ارادے توں جانکاری دیندے،جنہوں سنن والے بہوں شوق نال کن لاکے سنندے۔
مخالف بھٹو نوں مجمع باز، مداری تے کئی ہور نانواں نال بلاندے اصلوں اوہ بھٹو توں ڈردے سن۔ ایہہ ڈر باہرلی دنیا نوں وی سی، جدوں بھٹو ایٹم بمب بناون دا ارادہ کرلیا، اسلامی دنیا نوں اک مک کرن دی کارروائی پہلاں ای وڈی طاقتاں نوں ہضم نئیں ہورہی سی۔
بڑی طاقتاں ہوون یا اسٹیبلشمنٹ۔ ایہناں دا اک ای مسئلہ ہوندا اے “سانوں کیوں نئیں دسیا” یا “ساڈے توں پچھ کے چلو”
ایس بیانیے توں اختلاف اک وڈے ٹاکرے تے متھا لان والی حالت وچ لیاکھلاردا اے۔ بھٹو چاروں پاسے گھردا جارہیا سی، سیاسی جماعتاں نوں وی اسٹیبلشمنٹ سنگی بنالیا سی،اوس ہمت نئیں ہاری اوہناں نوں گل بات دی میز اتے لیاوں وچ کامیاب ہوگیا۔ اوہناں جماعتاں ایس نوں ہٹاون لئی اسٹیبلشمنٹ نال سانجھ بنالئی سی۔
امریکہ اپنا کھیڈ شروع کردتا اسلامی دنیا نوں اک مُک کرن دا سفنا دکھان والیاں نوں کمزور کرن لئی سازشاں دے جال بنن لگ گیا۔
ملک اندر دینی طبقہ ای ایس لیڈر خلاف اک مُک ہوگیا جیہڑا اسلامی دنیا دا لیڈر بن رہیا سی، ایہہ مذہبی جماعتاں اوہ سن جنہاں دا توکل رب دی تھان وڈی طاقتاں اتے ہوندا اے۔ رب تے ایمان رکھن والے اپنے فیدیاں دے دریا وچ کدے کشتیاں نئیں لاندے۔ پر ایہناں انج ای کیتا۔
وڈی طاقتاں رستے توں ہٹاون لئی کوئی وی طریقہ اپنانا سی، اوہناں مہرہ وی اجیہے لوکاں نوں بنایا جیہڑے اسلام دے وڈے ٹھیکیدار ہن۔ تاں جے بھٹو نوں بدنام کیتا جاسکے۔ ایہناں مہریاں نوں سوچن دی لوڑ سی اسلامی دنیا نوں اک تھان اتے اکٹھا کرن والے بھٹون نوں کیہڑے سیاسی فیدے دی لالچ سی۔ جے اوہ پاکستان وچ اپنے اقتدار نوں ودھا دینا چاہندا سی تے کیہ اوہ کسے دوجے علاقے توں دھاڑوی بن کے آیا سی۔ جیہدی اینی مخالفت کیتی جارہی سی۔ اوہ ایتھوں دا سی کوئی کرپٹ نئیں سی٫
جے کجھ قوتاں نوں ایس گل سانوں کیوں نئیں دسدا یا ساڈی مرضی خلاف چل رہیا اے، ایس پاروں اوس نوں راہ توں ہٹادتا گیا۔ ایہناں قوتاں اوہدوں وی چنگا نئیں کیتا سی، تے جے اوہ اج وی اجیہی سوچ رکھدیاں نیں تے ہن وی چنگا نئیں کررہیاں۔ ایہہ قوتاں ملک دے کسے وڈے نقصان لئی تیار رہن۔
اوہ بھل رہیاں نیں بھٹو روز روز نئیں جم دے۔