لکھاری
وقاص ضیا
بھارتی ریاست راجستھان دے شہر الور دے لاگے اک چھوٹا جیہا علاقہ بھان گڑھ اے جتھے کوئی بارہ سو لوک آباد نیں۔ ایس قصبے نوں سولہویں صدی وچ کچوالہ راجپوت سردار بھگونت داس نے آپنے چھوٹے پتر مادھو سنگھ لئی آباد کیتا۔مادھو اکبر بادشاہ دے خاصم خاص بندے مان سنگھ دا چھوٹا ویر سی۔ بھان گڑھ پہاڑی علاقہ اے تے ایتھے پرانیاں قلعہ نما عمارتاں موجود نیں جیہڑیاں ہن کھنڈر دی صورت وچ باقی نیں۔ ایس شہر دی خاص گل ایہہ وے کہ ایہدے راہ اتے قصبے دے باہرو باہر ہندوستان سرکار دے تاریخی عمارتاں دی کھوج والے محکمے نے بورڈ لکھ کے لائے نیں۔۔۔بورڈ تے لکھیا اے کوئی بندہ سورج ڈبن توں بعد اس قصبے وچ داخل ہوون دی کوشش نہ کرے۔ سورج ڈبن توں دوبارہ نکلن تیک ایس جگہ توں دور رہوو۔ ہر بندہ آپنے ڈنگراں نوں وی سورج ڈبن توں نکلن تک ایس جگہ توں دور رکھے۔ علاقے دے آپنے واسی وی آپنے ڈنگراں نوں شام توں پہلاں گھر دے اندر ڈک دیندے نیں۔ایس علاقے نوں باہروں ویکھو تے خوف تے دہشت بندے نوں گھبرا پادیندی اے۔ایس قصبے دی ایس حالت پاروں اک کہانی مشہور اے۔
کہندے نیں بئی جدوں راجہ نے ایتھے آپنا محل بنایا تے اوس دوران اک سادھو ساہمنے جھگی لا کے بہہ گیا۔راجہ نے اوس سادھو نوں کجھ نہ آکھیا تے اوس نوں اوتھے بہن دتا۔ اک دن راجہ موج اچ سی اوس سادھو نال گل کیتی بھئی تیرا گیان کیہہ کہندا اے۔۔۔میرے محل تے زوال کدوں آوے گا۔۔۔دوسرے لفظاں وچ اوس نے سادھو کولوں صلاح منگی کہ اوہ کیہڑا کم ہووے گاجیہڑا اوس دی مان مریادا دا دشمن بنے گا۔ اوس ویلے محل زیر تعمیر سی۔سادھو آکھیا۔راجہ ہک گل دا دھیان کریں جیس دن ترے محل دے کنگرے دا پرچھاواں مری جھگی تے پیا اوسے دن ترا راج مک جانا اے۔ راجے نے فوری طور تے حکم جاری کیتا کہ بھئی محل نوں اینا اچا نہیں کرنا کہ اوس دا سایہ سادھو دی جھگی اتے پووے۔ ویلا لنگھدا رہیا۔سادھو مرگیا تے اوس نوں اوس دی وصیت دے پاروں اوسے جھگی والی تھاں ای پور دتا گیا۔ راجہ وی مرگیا پر آپنیاں پیڑھیاں لئی وصیت کر گیا کہ سادھو دی گل دا دھیان رکھنا۔آکھدے نیں کہ تیسری پیڑھی وچ جیہڑا راجہ بنیا اوس حکم دے دتا کہ بھئی محل دے کنگرے اچے کرو تاں جے راج دی دہشت ودھے۔ لوکاں یاد کروایا بھئی سادھو نے چیتاونی دتی سی کہ محل دے کنگریاں نوں نیوواں رکھو۔راجے گل ہاسے وچ پادتی۔قصبے دے واسی دسدے سن کہ جس دیہاڑ اوہناں کنگریاں دا سایہ سادھو دی گور تے پیا اسے شام ہنیری تے طوفان وگیا۔مال ڈنگر ہر شے تباہ ہوگئی۔راجہ سمیت بہتے سارے لوک مرگئے۔اوس دن توں بعد اوتھے شام پیندیاں خوف پے جاندا۔عجیب آوازاں آندیاں تے ہر کوئی ڈر دے مارے گھر وچ لکن تے مجبور ہو جاندا۔ایہہ سلسلہ آج تک جاری اے۔۔۔سائنس ایس گل دا جواب دین توں قاصر اے تے بھارتی حکومت نے سرکاری طور تے اے منیا اے بھئی ایس قصبے نوں ویکھنا اے تے سورج دی روشنی وچ ویکھ کے ایتھوں نکل جاؤ۔سورج ڈبن توں بعد آپنے نال ہوون والے کار دے آپ وارث او۔ گوگل ارتھ تے ایس جگہ نوں ویکھو تے پتہ لگدا اے کہ اے کوئی بستی سی جیہڑی کدے وسدی سی تے نامی گرامی لوک رہندے سن تے ہن اتھے ہرپاسے خوف دا راج اے۔راجہ دااجڑیا محل تے سادھو دی گور اج وی اتھے نیں۔تے لوک اوہناں نوں ویکھ کے استغفار کردے نیں۔
