این آراو دی گل یاں کرسی کھسن دی فکر

لکھاری، اکرم ہدایت اللہ
وزیر اعظم عمران خان نےاپنی 8مہینیاں دی سرکار وچ کئی درجناں واری ایہہ گل کیتی اے بئی اوہ کسے نوں این آر او نہیں دیون گے۔ این آر او اصل وچ نیشنل ری کنسی لی ایشن آرڈر دا نکا ناں اے، جیہڑا 2007 وچ فوج آمر جنرل پرویز مشرف نے جاری کیتا سی، جس توں پہلاں اوہناں نے پیپلز پارٹی دی اوس ویلے دی آگو بے نظیر بھٹو نال امریکا نال رل کے مک مکا کیتا ۔ این آر او دے تھلے بے نظیر بھٹو نے پاکستان واپس آ کے چوناں وچ بھاگ لینا سی، مشرف نوں آرمی چیف دا عہدہ چھڈنا سی پر ملک دا صدررہنا سی۔ ایس دے بدلے وچ مشرف نے بے نظیر بھٹو دے خلاف نواز شریف دی 1997-99 دی حکومت وچ بنائے گئے سارے مقدمے عدالتاں وچ ٹرائل توں بغیر ختم کر دیتے سن۔ایس این آراو دا فائدہ الطاف حسین دی ایم کیوایم نوں وی ہوئیا تے ایس دے خلاف 8 ہزار تو ودھ مقدمے ختم کیتے گئے جیہدے وچ قتل دے مقدمے وی شامل سن۔ اج این آر او پاکستان دی سیاست وچ سبھ توں زیادہ ورتیا جاون والا اکھر بن گیا اے، جس دا عام مطلب دو نمبری لا کے مک مکا کرنا اے، این آر او لین والا چور اچکا، کرپٹ تے دو نمبری نال مال کٹھا کرن والا تے این آر او دین والا طاقتور، ڈنگ ٹپاو تے دو نمبری تے اکھ بند کرن والا اے۔ این آر او کرن دا مطلب ایہہ وے کہ کسی طاقتور نوں قانون تے عدالتوں تو اتے ای اتے ایس گل دی کلین چٹ دے دتی جاوے کہ ایہنےکوئی جرم نہیں کیتا تےجےکیتا وی اے تےاوہنوں چپ رہن اتےملک چھڈن دی اجازت اے، تے ملک توں باہرجا کے اوہ ملک دی سیاست وچ کوئی ونڈ نہیں پاوے گا۔ ایس این آراو واسطےکجھ گارنٹیاں وی متھیاں جان گیا۔ این آر او یاانگریزی وچ ڈیل یا مک مکا نوں پکا رکھن لئی کجھ زورآورملکی یاں غیر ملکی گارنٹی دیندے نیں کہ مک مکا تو کوئی وی نہیں پلٹے گا۔ عمران خان نے ہن تیک این آراو اتے اخیری گل 3 مئی نوں اسلام آباد وچ پترکاراں نال گل بات کردیاں کیتی۔ جیہدے وچ اوہ پہلی واری ایس حد تک گئے نیں کہ بھانویں کرسی کھس جائے اوہ احتساب توں پچھے نہیں ہٹن گے۔ایس توں اک دن پہلاں وی اونہاں نے ایہہ گل مہمند ڈیم دا نیہہ پتھر رکھن دے موقع تے وی کیتی جیہدی خاص گل ایہہ سی بئی اوس ویلے آرمی چیف جنرل قمر باجوہ وی اوہناں دی گل سنن والیاں وچ شامل سن۔عام تے خاص خیال ایہو ای کیتا جانداں اے کہ ملک وچ اصل طاقت والی صرف فوج اے تے این آر اوہ دین یاں نا دین دا آخیری فیصلہ اوہناں ای کرنا اے۔ تے پھیر عمران خان نے احتساب توں پچھے ناں ہٹن دی گل کردیاں کرسی کھسن دی گل کیوں کیتی؟ کیہ ہن اوہ ویلا نیڑے آرہیا اے جیہدے وچ وزیر اعظم عمران خان احتساب دی اپنی گل اتے قائم رہن لئی کوئی وڈا فیصلہ کرن گے، یاں اگر اوہ فیصلہ نہیں کردے تے کوئی ہور فیصلہ کردیوے گا؟ سنن وچ آرہیا اے بئی وزیر اعظم نوں بار بار ایہو ای کہیا جارہیا اے کہ ملک دی معیشت بہتر بناون لئی اوہ سیاسی حالات نوں ہور خراب ہوون تو بچان، ہن ویکھنا ایہہ اے بئی پہلے اکھ کون میٹ دا وے!