بوہتا منگ دیاں تھوڑے توں وی جائیے

لکھاری۔ اکبر علی غازی

میرے پنجابی سجناں نے میرے اردو دے حق وچ بولن تے اعتراض کیتا تے آکھیا جے پنجاب وچ انگریزی تے پنجابی ہونی چاہیدی اے بس. جہدا جواب میں ایہناں لفظاں وچ دتا
میرے پنجابی پیاریو, تہاڈا جوش, جذبہ تے سدھر مان جوگ اے. میں سلام پیش کرناں. پر حقی گل ایہہ وے جے ساڈے مطالبیاں دے مقابلے وچ عملی آہر کرن والیاں دی گنتی شرمناک حد تک گھٹ اے.پنجابی دے نفاذ دی گل عام لوکاں نوں اجے کھچ پان جوگی نئیں ہوئی.واہوا سارے لوک اجے وی اردو دے حق وچ نیں. واہوا سارے جی ہور جوڑن دی لوڑ اے. اپنے مطالبے صرف خواہشاں نئیں ناقابل تردید دلیلاں نال کراں گے تے سجن نیڑے آن گے. ایہ وی حقیقت اے جے اردو دی ترقی لئی بہتا ٹل وی پنجابیاں ای لایا سی تے آج وی اردو تحریک دےپچھے بہتے پنجابی ای نیں.ایہہ وی سچ اے جے پاکستان بنن توں پہلا ں تے بعد وچ وی اردو دی تھاں پنجابی نوں رائج کرن دیاں کوششاں وچ پنجابیاں ای بہتے روڑے اٹکانے سن. 1908ء وچ جدوں پنجاب یونیورسٹی دے وائس چانسلر ڈاکٹر بی سی چیٹر جی نے جلسہ تقسیم اسناد دی تقریب وچ خطاب کردیاں ہویاں آکھیا سی جے ” پنجاب میں اردو کی جگہ پنجابی کو رائج کیا جائے” تے سب توں بہتا غصہ پنجابیاں نوں ای چڑھیا سی. ایس گل اتے ڈاکٹر علامہ اقبال. سر شیخ عبدالقادر, سر محمد شفیع, مولانا شاہ سلمان پھلواری, سر علی امام تے مولوی محبوب عالم ورگے وڈے لوکاں نے شدید ردعمل دتا سی تے کھل کے مخالفت کیتی سی. آوہناں دے علم و فضل تے سیانف آتے شک نئیں کیتا جاسکدا. ایس لئی میں چپ رہواں گا پر ایس گل وچ شک نئیں جے انگریزی نکل جاوے تے حالات ٹھیک ہون دی امید لائی جا سکدی اے. ایتھے سوال پیدا ہندا اے۔ جے غیرمسلم سامراج دی زبان انگریزی تے سانوں قبول اے جنہے ساڈے شیہاں ورگے جوان بی اے وچ فیل کر کر کے رول دتے نیں جدوں کہ مسلماناں دی زبان, برصغیر دے مسلماناں دی ایکتا دی محافظ , عظیم اسلامی تعلیمات دی امین اردو قبول نئیں. انگریزی قبول کرن دا فیصلہ غلامی قبول کرن دا فیصلہ وی آکھیا جا سکدا اے کیوں جے چند ہزار ماہر ترجمے دے کم تے لا کے سائنس تے ٹیکنالوجی منتقل کیتی جا سکدی اے. ستر 70 سالاں وچ اسی انگریزی توں جان چھڈان وچ کامیاب نئیں ہو سکے جے ہن موقع بن دا پیا اے تے ہتھ بنھ کے درخواست اے جے جان چھٹن دتی جائے. انگریزی وچ رٹا لا کے آلے والا پڑھے ہوئے ڈاکٹر خدمت گھٹ تے لگا مال سود سمیت وصولن ول بہتا دھیان دیندے نیں. اردو والے ڈاکٹراں نے چنگے تے سستے طریقے نال قوم دی خدمت کرنی اے کیوں جے خرچہ بہتا نئیں ہویا ہونا.بھراؤ تے بھینو, اسیں رل مل کے اردو نوں اوہدی حد وچ رکھ لواں گے پر انگریزی ورگا جن کڈھنا اوکھا ہو جانا جے.پہلے مرحلے اتے مڈھلی تعلیم پنجابی وچ کروائی جا سکدی اے, فیر ہولی ہولی آٹھویں. دسویں. ایف اے تے بی اے وی پنجابی وچ کروایا جا سکدا اے. عدالتی زبان پنجابی تے صوبائی محکمیاں دی زبان وی پنجابی کروائی جا سکدی اے. میری منت اے جے ممکنات دا بھرواں جائزہ لے کے فیصلے کیتے جان. کتے ایہہ نہ ہووے جے بہتا منگدیاں منگدیاں تھوڑے توں وی جائیے.