لکھاری ..زاھد اقبال بٹ
ویلا اپنے اندر خوشیاں مصیبتاں حادثے،خوف،ںفرتاں،محبتاں،عر وج زوال،دکھ، روگ،قدرتی آفتاں دے ڈاھڈے پھیر،چھپائی بیٹھا اے ۔دنیا وچ پیر رکھن دالی ھر روح نوں اس ڈاھڈے پھیر دا ساھمناں کرنا پیندا اے ۔کجھ قدرتی آفتان نوں ٹالیا جا سکدا اے تے کجھ ضدی آفتاں ٹلن توں باز نھیں آوندیاں اجیھی آفتاں جد تائیں بھوئیں دی چیر پھاڑ نہ کر لین صبر نھیں آونداتے نہ ھی کوئی کلیا ایجاد ھویا اے کہ اس قدرتی چیر پھاڑ نوں اسیں ڈک سکئیے۔ایھ وس وچ تے وسوں باھر کھچ دھرو دی رسا کشیاں نیں ،بس سبھ ایھ سمجھ لو مفت وچ عدالتے لگیاں سب دیاں پیشیاں نیں،کجھ لوکاں دیاں دور اندیشیاں نیں پر ایہ گل پئیاں نریاں مصیبتاں نیں تے کجھ بھانے اوھناں دی حیاتی کھولھوں دیاں فقط پھیریاں نیں ، کجھ دی زندگی چ اوداس گھنیریاں نیں میتھوں سچ پچھوں تے ایہ حساسیت عروج دیاں پوڑھیاں نیں ،کجھ دے لڑھ لگیاں ھیرا پھیریاں نیں تے کدھرے لوکاں نوں لگیاں بیماریاں بھتیریاں نیں تے ایھناں بیماریاں نوں سھندیاں پورے ھو جاندے نیں تے کئیاں دے ڈھلدے ھاسے مکن دا ناں ای نھیں لیندے ایھ سارے ھاسے ایھناں دی جند دیاں ھلا شیریاں نیں ، کئیاں دیاں جدائیاں پاروں اوھناں دی حیاتیاں وچ گھپ ھنیریاں نیں تے دوجے پاسے ملاپ دیاں مستیاں ای مستیاں نیں … …مترا….ایس حیاتی وچ کجھ زات پات دے مارے لوکاں کنی پیتے پگھلے شیشے نیں تاں جے جگت وچ کوڑھ گھٹ ھو سکے تے چالو ویھار وچ انسانان وچکار ورتارا بھتر ھو سکے پر طاقتوراں دی انا دے ڈھائے چڑھے انساناں نوں کپن دے شوق اجے تائیں جاری نیں.،ظالماں انساناں نوں جیوندے جی بدوبدی موت دے کھوھ وچ سٹیا نیں فیر اوسے تھاں اتے زورآوراں ٹھٹھے کردیاں دور شراباٰ برپا کیتے نیں تے ایہ طاقت دا ٹھرک تے لوکاں نوں ھتھی جانوں مارن دا سلسلا جاری اے ، عزتاں لٹن تے عزتاں اچھالن دے کارے اجے وی جاری نیں جیھڑا کردار زورآوراں دا سی اوھدا رنگ لوکاں نون چڑھدا نظر آ رھیا اے تے ھر دوجا بندھ ھر ویلے لال پیلا ھوون واسطے تیار بیٹھا اے. جیکر تسیں جانوں مارن دا رسک نھیں لیندے چپیڑ تے اسانی نال مار سکدے اوہ جے ایہ وی نہ کر سکوتے عام بندہ فیر ھتھے چڑھی طاقت نال بدتمیزی تے مندے بول بولن توں نھیں رھندا تے اپنے آپ نوں غالب ثابت کرن لئی ھوچے ھتھکنڈے ورتن تے ھراساں کرن توں باز نھیں آوندا ھن تسیں آپوں سوچو ، کیھ مان کرئیے انسان ھوون دا تے انسانیت دا جتھے مڈھوں ای قتل کرن دے ایھ ٹیچے متھے سن ۔
978
