اسلام آباد: عالمی مالیاتی فنڈ (آئی ایم ایف) نے پاکستان دے متھے لگن والے ڈاھڈے اقتصادی چیلنجاں لئی غلط پالیسیاں تے ناکافی پالیسی کارروائیاں نوں قراردتا، جیہدی ذمہ واری اگے پچھے آون والیاں دو سیاسی سرکارں پاکستان مسلم لیگ (ن) تے پاکستان تحریک انصاف (پی ٹی آئی) اتے آوندی اے۔
ڈان اخبار دی رپورٹ مطابق ایس ہفتے آئی ایم ایف دے ایگزیکٹو بورڈ ولوں پاکستان لئی منظور 6 ارب ڈالر دے بیل آؤٹ پیکج اتے اپنی اسٹاف رپورٹ وچ ادارے نے آکھیا اے کہ کیویں اقتصادی اوکڑاں پیدا ہوئیاں تے کیویں اصلاحاتی اقدامات وچ دیر کیتی گئی۔ آئی ایم ایف نے پاکستان مسلم لیگ (ن) دی حکومت نوں غیرمتوازن پالیسیاں تے نامکمل اصلاحات دا ذمہ دار قرار دتا۔
ادارے نے دسیا کہ’ غلط اقتصادی پالیسیاں وچ وڈے مالی خسارے، کمزور مانیٹری پالیسی تے زیادہ ایکسچینج ریٹ دا دفاع ، ایندھن دی کھپت تے چالو ورھے وچ گھٹ چر دی ترقی دے نال مائیکرواکنامک بفرز وچ کمی، ودھدے باہر دے تے عوام قرضے ایس دے نال مک جاون والے غیرملکی ذخیرے شامل نیں۔
آئی ایم ایف نے ہن والی پی ٹی آئی دی سرکار نوں دیر کرن تے اصلاح لئی کیتے گئے غیرتسلی جوگ پالیسیی کارگزاری دا ذمہ وار قراردتا اے۔ ایس دے نال ایہہ وی دسیا پئی ایکسچینج ریٹ وچ کجھ گھاٹا تے ڈاھڈی مانیٹری پالیسی باوجود اپریل 2019 تک غیرملکی زرمبادلہ وچ وڈی مداخلت ویکھن نوں آئی۔
عالمی ادارہ سرکار دی کارگزاری اتے مطمئن وکھائی نئیں دتا، اوس آکھیا کہ 2 بجٹ ترمیماں باوجود مالی سال دی پہلی شماہی وچ مالی دیری صاف وکھائی دیندی رہی، جدکے بجلی تے گیس ٹیرف وچ وادھا مالی نقصاناں نوں پورا کرن لئی کافی نئیں رہیا٫
ایہہ نشاندہی وی کیتی گئی کہ دوپاسی قرض دین والیاں ولوں گھٹ مدت وچ اچیچی مالی مدد دتی گئی، لیکن مڈھلے مسئلے حل کرن لئی فوری عمل نہ کیتا گیا تاں اگلے ورھیاں وچ قرض اتارنا اوکھا ہوجاوے گا، ایہہ بھار ودھ جاوے گا۔
706
